OÉ-CUSSE 10 outubru 2023 (TATOLI – Diretora Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAAEOA), Luiza da Costa, informa, formasaun ba lideransa komunitária no jestór sira kona-bá prosesu eleisaun suku finaliza ona, hodi prepara simu kandidadatu iha loron sesta 13 outubru semana ne’e.
“Ita fasilita formasaun ba autoridade komunitáriu sira, xefe suku 18, xefe aldeia 63 no jestór sub-rejiaun haat, kona-bá prosesu konstitui no funsionamentu meja asembleia iha eleisaun suku atu hatene idak-idak nia kna’ar,” Diretora STAE Oé-Cusse, Luiza da Costa ba Tatoli iha Oé-Cusse, tersa ne’e.
Ni esplika, formasaun ne’e importante atu sensibiliza mós matadalan Lei númeru 9/2016 kona-bá prosedimentu aprezentasaun kandidatura no lala’ok eleisaun ba membru órgaun suku sira no oinsá hato’o keisa no reklamasaun karik mosu irregularudade iha prosesu eleisaun.
“Tanba iha loron 13 outubru sesta semana ne’e, hahú simu rejistu kandidatu xefe suku atu konkorre iha eleisaun suku ne’e, oras atu ba rejistu iha lei permite oras haat de’it, tuku 10:00, hahú no taka iha tuku 13:00 sei liuhosi ne’e, la autoriza ona, hein fali tinan hitu mai mak bele partisipa atu kandidataan fali, bá xefe aldeia, sei aprezenta dokumentu iha loron 28 outubru,” nia katak.
Daudaun parte STAE simu ona kabina votu ka urna to’o ona Oé-Cusse, kona-bá transporte atu apoia iha eleisaun suku, konfirmadu ona, katak autoridade RAEOA sei apoia karreta 31.
Entretantu, kona-bá eleitór eleijível atu partisipa iha eleisaun suku, daudaun ne’e parte STAE Oé-Cusse dezloka ona tékniku sira iha nasionál hodi halo sinkronizasaun, maka foin hatene dadus fiksa kona-bá eleitór sira.
Maibé bezea dadús eleitór ne’ebé partisipa iha eleisaun parlamentár iha loron 21 fulan maiu tinan 2023 hamutuk 54.291, mane 27.681 no feto 26.610.
Kona-bá sentru votasaun nian, STAE identifika ona hamutuk sentru votasaun 63, destaka iha aldeia 63 kabe ba suku 18 iha territóriu Oé-Cusse.
Notísia relevante: STAE Oé-Cusse forma pesoál 18 molok destaka apoia eleisaun suku
Jornalista: Abílio Elo Nini
Editór: Evaristo Soares Martins
