OÉ-CUSSE, 05 outubru 2023 (TATOLI – Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), kinta ne’e abertura formasaun ba Pesoál STAE Apoia Suku (PSAS) hamutuk na’in-18 molok destaka iha suku 18 iha Oé-Cusse hodi apoia eleisaun xefe suku peródu 2023 ne’e.
Notísia relevante: STAE Oé-Cusse prepara viatura 50 tula materiál ba sentru votasaun 80
Iha abertura ne’e, Diretora STAE Oé-Cusse, Luiza da Costa, hateten, objetivu hosi formasaun ne’e importante atu hetan matéria no simulasaun prátika durante loron tolu, molok dezloka suku apoia fó apoia ba eleisaun suku.
Nia informa, kna’ar PSAS Pesoál STAE Apoia Aldeia (PSAA) lahanesan, ba PSAS nu’udar pesoál koletivu públiku iha suku ne’ebé rekrutadu hosi STAE hodi fó nia tulun ba planu organiza no implementasaun órgaun suku.
Ho nia papél maka, koordena servisu ho autoridade lokál kona-bá realizasaun eleisaun órgaun suku, no identifika fatin ba meja eleitorál asembleia aldeia hodi realiza eleisaun suku no sai hanesan responsavél ba planu logístka ba meja eleitorál asembleia aldeia, halo esklaresimentu ba komunidade kona-bá, edukasaun votante no sosializa lei eleisaun suku.
Nune’e mós fasilita formasaun ba membru meja eleitorál suku, apoia xefe suku atuál hodi realiza enkontru hodi forma meja eleitorál suku, apoia meja eleitorálsuku hodi simu aprezentasaun kandidatura ba kandidatu xefe suku, apoia meja eleitorál suku hodi organiza bulletin votu ba eleisaun xeef suku.
Kona-bá PSAA ne’e nu’udar pesoál koletivu públiku iha aldeia ne’ebé rekrutadu hosi STAE hodi fó nia tulun ba organiza no implementa eleisaun orgaun suku iha nível aldeia.
Ho nia papél atu apoia meja eleitorál asembleia aldeia hodi organiza kontajen rezultadu eleisaun orgaun suku, apoia meja eleitorál asembleia aldeia hodi organiza reklamasaun no rekursu ba prosesu eleisaun orgaun suku, apoia meja eleitorál asembleia aldeia hodi organiza distribui fila materiál no rezultadu eleisaun iha aldeia ba sede, inklui hala’o kna’ar seluk bainhira hetan delega.
Reprezentante hosi Ministériu Administrasaun Estatál (MAE), Domingos Pires Monis, espera, durante formasaun loron tolu, bele hamosu deskusaun ho formadór sira hodi aumenta koñesimentu, tanba bainhira destaka iha suku sai mós formadór iha nivél suku no aldeia.
“Ohin imi sai hanesan formandu maibé banihira tun ba suku sira sei sai hanesan formadór, tan ne’e matéria ne’ebé simu durante loron persiza iha koñesimentu no konsulta ho formadór sira, nune’e bele fasilita ba xefe suku no aldeia inklui Pesoál STAE Apoia Aldeia, ha’u garante katak eleisaun suku sei la’oho susesu,” nia katak
Notísia relevante: STAE Oé-Cusse rejista eleitór foun no bele partisipa iha eleisaun suku
Jornalista: Abílio Elo Nini
Editór: Evaristo Soares Martins
