DILI, 10 outubru 2023 (TATOLI)—TANE Konsumidór, tersa ne’e, lansa estudu merkadu ba loja hamutuk 21 iha Dili, kona-ba kabaz ho produtu esensiál ka nesesidade bázika ho tipu 22, ne’ebé konsumidór timor-oan uza loron-loron.
“Peskiza ne’e, hanesan pasu fundamentál ida atu konsumidór sira bele aserta eskolla no bele analiza folin sira ho ninia evolusaun,” dehan Prezidente TANE Konsumidór, António Ramos ba Jornalista sira liuhosi konferénsia imprensa iha tersa ne’e.
Estudu ne’e, nia dehan atu ajuda mós konsumidór sira jere nia-osan no hetan informasaun ba kompra produtu sira ba nesesidade loron-loron.
Kabaz ne’ebé foti ba estudu ne’e, nia dehan hamutuk tipu 22, kompostu hosi foos, na’an-manu, masin midar, manteiga, mina, susuben (bee no po), manu tolun, na’an fahi, trigu, masan, bebida malirin sira inklui serveja.
“Produtu sira ne’e hotu eziste iha loja sira ne’ebé hili mak baratu liu iha loja Grasa Shop iha área Comor no produtu sira karun liu iha loja Family First, la hare ba marka ka orijin hosi produtu,” nia subliña.
Peskiza halo iha loja sira ne’ebé maka fa’an produtu ho folin kiik liu to’o boot liu, relasiona ho produtu selesiona no korresponde ba família timor-oan nia nesesidade ho folin baratu iha loja Grasa Shop mak foos 25kg ho folin $14.50, trigu 1kg ho $1, frangu 800g ho $ 2,50, kombong 1kg ho $ 1,70, salsisha 1un ho $1.00, na’an fahi 1kg ho $4.35, masin midar 1kg ho $ 2.00, manteiga 250gr ho $ 0,45, mina 2l ho $3,85, susu been rahun 250 gr ho $2,50, manu tolun ho $ 2.05, masan 1kg ho $1,75, sabraka 1kg ho $ 1.80, fehuk europa 1kg ho $ 1.00, senoura 1kg ho $ 1.00, tomate 1kg ho $ 1.50, bebida Cola 250 ml ho $0,65, bebida ho álkoliku 250 ml ho $ 0,65, bebida la ho alkóliku l ho $ 0,50 no serveza 250 ml ho folin $ 1.25.
TANE identifika iha diferensa boot tebes entre kabaz, karun liu ho ida baratu liu maka $14,50, ho diferensa 30%, ne’ebé analiza ketak ho produtu barak maka folin karun dobru ou triplu tan kompara ho sira folin baratu, hanesan foos, naan fahi, masan no masin midar no seluk tan.
“Ami hakarak destaka kazu foos, ne’ebé produtu ai-han indispensável ba konsumidór timor-oan hotu. Presu kiik liu ba produtu ne’e hetan iha Grasa Shop ho folin kilograma 25 maka $14,50,” nota hosi TANE esplika.
Notísia relevante: TANE halo estudu folin merkadu ba produtu esensiál
Jornalista : Jesuína Xavier
Editor : Florencio Miranda Ximenes
