ANC husu operadór telekomunikasaun kontinua prosesu rejistrasaun sim card
BAUCAU, 11 outubru 2023 (TATOLI) – Autoridade Nasionál Komunikasaun (ANC, sigla portugés) husu operadór komunikasaun atu kontinua rejista sim card iha Timor-Leste
Diretór Tekniku ANC, Vidal Gomes, esplika, prosesu rejistrasaun refere hala’o hosi operadór telekomunikasaun hamutuk tolu komposta hosi TELKOMCEL, Timor Telecom no Telemor iha tinan-2017 no sei kontinua nune’e bainhira kliente sira sosa kartaun iha loja operadór sira.
“Aproveita oportunidade ida-ne’e hakarak aviza ba hotu-hotu liuliu operadór sira, karik fa’an sim card tenke rejistu,” Diretór Tekniku ANC hateten iha Sentru Konvensaun Baucau (CCB, sigla portugés) Vila Antiga, kuarta ne’e.
ANC sei kontinua observa, monitoriza tuir ba kada operadór telekomunikasaun sira iha terrenu bazea ba regulamentu ne’ebé estabelese tanba bainhira la rejistu sei hetan multa orsamentu hosi $500 too rihun $200 tuir gravidade tuir dekretu-lei númeru 15/2012.
Kada operadór telekomunikasaun fó sai ona informasaun rejistrasaun ba kliente sira hanesan bainhira sosa sim card sei lori kartaun identidade hanesan válidu hosi idade 17 ba leten, enkuantu kategoria labarik sei utiliza identidade inan-aman.
Objetivu halo rejistrasaun tanba atu atualiza dadus, identidade pesoál no prevene krime hanesan tolok no seluk tan, ne’ebé atake personalidade ema seluk nian.
“Fiar katak ita bele kontrola iha futuru,” Vidal Gomes akresenta.
Tuir dadus hosi ANC, totál kliente ne’ebé uza sim card hosi operadór telekomunikasaun tolu iha Timor-Leste hamutuk hotu millaun 1,4-resin.
Notísia relevante: ANC sosializa regulamentu komunikasaun iha Baucau
Jornalista : Natalino Belo
Editór : Evaristo Soares Martins
