VIQUEQUE, 11 outubru 2023 (TATOLI)–Autoridade Tributária, kuarta ne’e, disemina lei Parlamentu Nasionál númeru 8/2008 30 juñu Lei Tributária, ba abitante sira iha Viqueque, liu-liu artigu 55 kona-ba renda.
“Objetivu atividade ne’e hodi fahe informasaun kona-ba aluga uma, rai privadu inklui jogu no impostu iha nível munisípiu sira, tanba iha Dili implementa ona lei selu impostu. Liu-liu ba komunidade ne’ebé iha empreza ka fó aluga uma privadu hanesan kost na’in, Guess House no seluk tan. Nune’e, ba uma privadu no jogu sira ne’e tenke selu tuir lei impostu,” Diretór Autoridade Tributária Baucau, Nuno N. de Almeida, hateten iha abertura diseminasaun, iha salaun postu Viqueque Vila, kuarta ne’e.
Bazeia Lei Tributária númeru 8/2008, artigu 55, ko’alia kona-ba pesoál ka empreza bainhira halo pagamentu ruma ba ema (rezidente) ida, laiha permanente iha Timor-Leste no naun-rezidente ba rendimentu selu rai, edifísiu iha Timor-Leste iha obrigasaun tenke halo retensaun impostu tuir tarifa 10% hosi totál rendimentu brutu ba aluga bainhira atu selu, tamba ne’e mak halo diseminasaun ba Autoridade munisipál hotu hodi bele iha koñesimentu kle’an kona-ba ninia lala’ok.
Notísia relevante : MF sosializa prosesu implementasaun lei tributária ba abitante Viqueque
Diretór observa, durante ne’e uma kost privadu sira seidauk selu impostu, nune’e diseminasaun ne’e ho intensaun atu abitante sira bele kompreende, tanba sidadaun ne’ebé iha rendimentu iha obrigasaun kumpre selu impostu nu’udar kontribuisaun ba dezenvolvimentu nasionál, tuir Lei Tributária.
“Durante ne’e, ita seidauk aplika selu uma kost sira, tanba ne’e, ha’u mai disemina lei bazeia ba regulamentu sira-ne’e,”nia akresenta.
Impostu hanesan kontribuisaun hosi povu atu selu ka hatama ba kofre Estadu, ne’ebé baze legál ho lei no regulamentu sira ho intensaun kontraprestasaun direta, maibé Estadu sei uza hodi finansia, hadi’a no halo despeza públika iha dezenvolvimentu nasional Timor-Leste.
Inisiativa ne’e atu rekolla impostu liuhosi halo identifikasaun no buka tuir dadus uma privadu, kost, Guest House (uma privadu halo arendamentu), maibé la selu impostu retensaun no seluk tan.
Iha fatin hanesan, Prezidente Autoridade munisípiu Viqueque, Januário Soares ‘Bolly’, hateten, ohin hola parte hodi hatene informasaun.
“Ita tenke selu rai ne’ebé ita hala’o atividade negósiu ruma,” nia tenik.
Atividade diseminasaun ne’e partisipa hosi empreza, diretór munisipál, liña ministeriál, no autoridade lokál sira iha munisípiu Viqueque.
Jornalista : Vitorino Lopes da Costa
Editora : Julia Chatarina
