Autoridade Viqueque delega Rui da Costa substitui provizóriu Administradór Lacluta
VIQUEQUE, 11 outubru 2023 (TATOLI)—Autoridade munisípiu Viqueque delega atuál Xefe Departamentu Ajénsia Dezenvolvimentu Viqueque, Rui da Costa, hodi asume knaar hanesan Administradór postu Lacluta interinu, hodi substitui Administradór postu Lacluta, José dos Santos Andrade, ne’ebé tama ona ba idade reforma.
“Durante semana rua, postu Lacluta laiha administradór ida atu asegura servisu Estadu. Nune’e, ha’u fó kompeténsia ba Xefe Departamentu Ajénsia Planeamentu, Rui da Costa, hodi asume kargu Administradór Lacluta interinu, hodi lidera postu Lacluta hodi hein desizaun hosi Governu sentrál,” Prezidente Autoridade munisípiu Viqueque, Januário Soares ‘Bolly’, informa ba Agência Tatoli, iha postu Viqueque Vila, kuarta ne’e.
Nomeasaun ne’e bazeia ba karta ofísiu númeru 138/DNSIGE/SCFP/GSE/VIII/2023 kona-ba sesasaun servisu nu’udar funsionáriu públiku iha Administrasaun munisípiu Viqueque ba José Andrade dos Santos, TP/C, ne’ebé implika mós ba sesaun kargu xefia nu’udar Administradór postu administrativu Lacluta nian ne’ebé asume hosi funsionáriu.
Notísia relevante : Autoridade Lacluta konsidera edukasaun sívika importante ba líder komunitáriu
Nune’e, atu asegura normál funsionamentu servisu administrasaun hodi bele fó atendimentu públiku iha administrativu Lacluta nian maka bazeia ba dekretu-lei númeru 3/2016, 16 marsu no dekretu-lei númeru 49/2023, 23 agostu nu’udar PAM/AM Viqueque, fó orden servisu ba funsionáriu, Raul da Costa, ho pozisaun atuál hanesan Departamentu Ajénsia Dezenvolvimentu Viqueque.
Desizaun ne’e hodi hala’o knaar simultáneamente nu’udar Administradór postu Lacluta interinu hodi hein prosesu nomeasaun foun tuir mai hosi instituisaun relevante.
Iha fatin hanesan, Administradór postu Lacluta interinu, Rui da Costa, hateten, servisu no nesesidade importante ida maka atu lidera no akompaña eleisaun suku ne’ebé sei realiza iha loron 28 outubru tinan ne’e.
Karta administradór Lacluta ofisialmente entrega hosi Sekretáriu munisípiu Viqueque, Teotónio Sarmento da Silva, akompaña hosi Administradór postu Lacluta sesante, José dos Santos Andrade no Diretór rekursu umanu munisípiu Viqueque, iha loron 09 outubru 2023.
Jornalista : Vitorino Lopes da Costa
Editora : Julia Chatarina
