VIQUEQUE, 11 outubru 2023 (TATOLI)—Servisu Edukasaun Viqueque rejista estudante hamutuk 3.402 hosi tinan letivu 2023, sei partisipa ezame nasionál iha loron 16 outubru.
“Tinan ida-ne’e, estudante hosi Viqueque kompostu hosi ensinu báziku, sekundáriu jerál no sekundáriu tékniku vokasionál hamutuk 3.401 maka daudaun prepara hela atu partisipa iha ezame nasionál iha semana oin,” Diretór Servisu Edukasaun munisípiu Viqueque, Domingos Brandão, relata ba Agência Tatoli, iha ninia knaar fatin, Beloi, kuarta ne’e.
Servisu Edukasaun munisipál distribui ona manuál ezame nasionál no ezame lokál ba eskola sira.
“Ami horiseik (tersa) distribui ona númeru estudante ba ezame nasionál no profesór sira ohin distribui ona ba estudante sira ba realizasaun ezame nasionál no ezame lokál,” nia akresenta.
Realizasaun ezame nasionál munisípiu Viqueque maka Eskola Ensinu Báziku Sentrál (EBC, sigla portugés) hamutuk 26, Ensinu Sekundáriu Jerál (ESJ) hamutuk sia no Sekundáriu Tékniku Vokasionál.
“Tuir planu, iha loron 12 outubru, ami sei ba foti pontu ezame nasionál no loron 14 outubru ami hahú distribui pontu ezame ba postu lima no sei rai iha Eskuadra Polísia sira hodi bele asegura, nune’e loron 16 outubru maka profesór sira foti hodi realiza ezame nasionál,” nia hato’o.
Notísia relevante : Estudante 4.159 iha Bobonaro sei partisipa ezame nasionál
Aleinde ne’e, estudante sira ne’ebé hetan impedimentu iha loron ezame, sei partisipa iha eskritóriu kada eskola no bele tuir ezame iha edukasaun munisípiu Viqueque.
“Ha’u orienta ona ba Diretór eskola sira, liu-liu estudante sira ne’ebé hetan problema, tenke ajuda estudante sira atu sira bele tuir ezame nasionál, tanba iha Viqueque estudante na’in-lima maka iha problema, maibé sira prontu atu partisipa ezame nasionál,” nia relata.
Ho nune’e, nia husu estudante sira iha munisípiu Viqueque hodi estuda nune’e bele hetan valór di’ak nune’e bele asesu programa balun ne’ebé Governu introdús.
“Ha’u orienta ona Diretór eskola sira hodi fó hanoin ba estudante sira hodi estuda atubele hetan valór di’ak hodi asesu ba bolsa méritu no universidase sira. Tanba ita-nia Governu mós sei trasa programa bolsa méritu ba estudante sira ne’e hodi motiva estudante sira,” Diretór informa.
Tuir dadus, estudante ne’ebé partisipa iha ezame nasionál kompostu husi EBC na’in-1.925 okupa sala hamutuk 110, ESJ kompostu hosi siénsia teknólojia na’in-780, siénsia sosiál umanidade na’in-587 sei okupa sala 34 no Eskola Tékniku Vokasionál hosi departamentu informátika na’in-32 no departamentu agraria na’in-78, ho totál na’in-110, ne’ebé sei okupa sala hitu.
Jornalista : Vitorino Lopes da Costa
Editora : Julia Chatarina
