ANCT sosializa dekretu lei rejime kontrola Tabako iha Maliana
BOBONARO, 12 outubru 2023 (TATOLI) – Aliansa Nasionál Kontra Tabaku (ANCT, sigla portugues) Timor-Leste, hamutuk ho Autoridade Inspesaun Finskalizasaun Atividade Ekonómiku Sanitária no Alimentár, Institutu Públiku (AIFAESA,I.P), kinta ne’e sosializa dekretu lei numeru númeru 14/2016 kona-bá rejime kontrolu tabako ba vendedór sira iha kapitál Maliana, munisípiu Bobonaro.
Diretór Ezekutivu ANCT-TL, Sancho Belito Fernandes, esplika sosializasaun ne’e atu hasa’e vendedór sira-nia koñesimentu kona-bá dekretu lei refere
Notísia relevante: ANCT-TL husu hasa’e presu tabaku iha Timor-Leste
“Ita halo sosializasaun lei kontrolu tabaku ne’e ba vendedór sira, tanba ita-nia dekretu lei ne’e papél barak liu ne’e vendedór sira mak hala’o, sira mak implementa, ezemplu sira mak halo promosaun, sira labele fa’an ba labarik minoridade, sira labele fa’an tabaku ilegál, sira mós labele halo komersializasaun tabaku ilísitu,” nia informa ba jornalista sira iha edifísiu Alfándega, munisípiu Bobonaro.
Ezekutivu ne’e haklaken, iha atividade refere ANCTL fasilita mos formasaun ba negosiante sira oinsá atu implementa lei refere ho di’ak no loloos.
“Ami fasilita sira kona-ba negósiu sira-ne’ebé ita bele hala’o, oinsá ita bele simu vendedór sira, oinsá ita haree uluk kartaun identidade hodi komfirma idade molok fa’an tabaku ba sira, inklui oinsá mós halo métodu komunikasaun di’ak ho kliente sira, atu labele hetan rezisténsia hosi kliente sira-ne’ebé tuir lei labele fa’an tabaku ba minoridade sira,” nia apela.
Xefe Asuntu Jurídika AIFAESA, Januário Miranda da Silva, hateten AIFAESA hola pozisaun ba rejime ne’ebé foka liubá artigu 15 to’o 17 ne’ebé ko’alia kona-bá bandu fuma iha espasu públiku sira, bandu fa’an sigarru-rahun no bandu atu fa’an tabaku eletróniku.
“Tanba rejime ne’e rasik, wainhira ami halo inspesaun no fiskalizasaun ba atvidade ekonómiku sira iha loja ka kioske sira, bainhira ami identifika ida-ne’e, ami sei halo auto-notísia no ami sei halo prosesu,” nia katak.
Prezidente Autoridade Munisípiu Bobonaro, Ernesto de Oliveira Barreto, konsidera liuhosi atividade nee’e bele hasa’e vendedór sira-nia koñesimentu hodi kumpre lei ne’e.
Ba oin autoridade munisípiu Bobonaro mós prontu servisu hamutuk ho ANCT-TL no AIFAESA halo sosializasaun dekretu lei refere, nune’e negosiante tabaku sira fa’an ho seguru, saudável no prevene minoridade labele fuma.
“Ita hotu presiza halo tuir, tanba ita-nia governu halo lei ida-ne’e, atu lakoi sakrifika ita-nia vida mak nia halo ida-ne’e, atu kotrola tabaku, ita sente fuma ne’e diak, maibé fuma ne’e oho ema barak ona iha mundu,” nia hateten.
Enkauntu atividade ne’e hetan apoia hosi SASCAS ne’ebé sei implementa iha munisípiu alvu sira hanesan Bobonaro, Covalima no Reajiaun Administrativa Espesiál Oe-Cuse Ambeno (RAEOA).
Notísia relevante:ANCT-TL konsidera folin tabaku sa’e hadook labarik minoridade hosi fuma
Jornalista: Sérgio da Cruz
Editór: Evaristo Soares Martins
