DILI, 12 outubru 2023 (TATOLI) – Ministru Administrasaun Estatál (MA), Tomás Cabral, husu ba Provínsia Hunan husi Xina, atu espande atividade iha setór agrikultura no akikultura iha Manatuto hodi envolve direita populasaun iha munisípiu ne’e.
Pedidu ne’e mosu hafoin Governu Provínsia Hunan hakarak reforsa ekonomia Timor-Leste liuhusi hasa’e produsaun agríkola, peska, pekuária no ortikultura, liuliu iha Manatuto.
Timor-Leste estabelese ona kooperasaun ho Provínsia Hunan iha tinan 2014 no 2017 no hakarak atu espande programa ida-ne’e hodi intensifika kooperasaun iha tinan lima oinmai, ho objetivu atu hametin ekonomia nasionál.
“Fulan-maiu 2024 programa ne’e halo tinan 10 ona, maibé tanba halo atividade ki’ik hela, entaun ita husu ba sira apoia komunidade. Ita hakarak ne’e sira tenke envolve komunidade iha atividade haki’ak ikan. Ita husu sira halo pilotu hodi ajuda povu, depois mak ita haree nia rezultadu”, ministru dehan iha Colmera, ohin.
Iha setembru liubá, Governadór Provínsia Hunan, Mao Weiming, ho nia ekipa halo ona enkontru ho MAE ba kontinuidade kooperasaun iha área edukasaun no agrikultura ne’ebé sei halo iha Manatuto.
“Governadór Hunan China hakarak kontinua kooperasaun iha área edukasaun, agrikultura no medisina nian. Sira hakarak atu fó bolsa estudu, entaun ha’u tranzmite ba administradór atu nune’e kooperasaun bele la’o”, hatete.
“Iha Manatuto ne’e sira [husi Hunan] kuda hela modo, haki’ak fahi. Agora, ami husu labele halo buat ki’ik ne’e, entaun ho ida-ne’e sira bá haree natar ektare 800 no presiza bee. Governadór ne’e dehan bee iirigsaun bele fura de’it”, esplika.
Kona-ba kooperasaun iha edukasaun sei disponibilzia bolsa estudu ba timoroan, liuliu ba Manatuto oan tuir akordu ne’ebé asina husi parte rua.
Programa bolsa estudu ba timoroan atu aprende abilidade tekníka espesializada iha área agrikultura hanesan kompromisu boot husi Governu Provínsia Hunan no Timor-Leste.
Notísia relevante: Timor-Leste no Provínsia Hunan Xina reafirma akordu kooperasaun
Jornalista: Osória Marques
Editora: Maria Auxiliadora
