VIQUEQUE, 12 outubru 2023 (TATOLI)-Komadante Polísia Nasionál Timor Leste (PNTL) munisípiu Viqueque, Superintendente João da Costa, hateten PNTL sei asegura Eleisaun Suku ne’ebé sei realiza, 28 outubru 2023 iha munisípiu Viqueque.
“Ami-nia dever maka seguransa nune’e ba eleisaun ida-ne’e. Ami sei asegura hodi prosesu eleisaun sira-ne’ebé realiza iha suku no aldeia sira iha munisípiu Viqueque la’o ho di’ak. Tanba eleisaun ida-ne’e nu’udar eleisaun famíliar nian ne’ebé tenke la’o ho pás nian laran”, João da Costa, hateten ba Agência Tatoli, iha edifísiu Sekretáriu Tekniku Administrasaun Eleitorál (STAE), kinta ne’e.
João hatutan, seguransa nafatin dever hodi asegura no garante ba establidade iha munisípiu Viqueque no abitante sira iha aldeia no suku nafatin kolabora ho parte seguransa atu eleisaun suku bele hetan susesu.
“Ha’u husu ba abitante hotu iha munisípiu Viqueque kolabora no koopera ho ami hodi ita realiza ita-nia eleisaun bele ho susesu. Maske eleisaun ne’e loron ida ka rua, maibé importante determina futuru aldeia no suku nian”, nia hato’o.
Nia dehan, eleisaun suku tenke imparsial independente no festa família tenke sai festa família labele kria problema iha fatin eleisaun sira iha munisípiu Viqueque.
“Ita ukun aan tinan 22 resin ona, ita hanoin boot nune’e ita tenke kria buat ne’ebé di’ak ba ita-nia suku no postu sira tanba eleisaun atu hili ita-nia lidersan hodi servi ba ita no suku laran”. suku iha
Alende nia husu, membru asembleia meza tenke serbisu ho resposavél transparansia, krediblidade hodi lidera meza eleisaun suku no ba komunidade, juventude, polísia komunitária sira no Ofísial Polísia suku OPS ne’ebé destaka iha suku ida-idak hodi grante ba seguransa.
“Ita hakarak Eleisaun Suku ne’e tenke la’o ho susesu, eleitór sira ezerse sira-nia diretu votu iha fatin votasaun; labele iha ameasa no ema tenke la’o livre durante iha eleisaun,” nia apela.
Jornalista: Vitorino Lopes da Costa
Editora : Julia Chatarina
