OÉ-CUSSE, 12 outubru 2023 (TATOLI)-Ekipa hosi Sekretáriu Estadu Arte no Kultura (SEAK), kinta ne’e, hala’o enkontru ho Autoridade Rejiaun Administrativu Espesiál Oé-cusse Ambeno (RAEOA) hodi halo koordenasaun ba programa interkámbiu festivál kulturál iha fronteira Timor-Leste ho Indonézia iha munisipíu Bobonaru, ne’ebé tuir planu sei realiza iha loron 15 fulan-novembru 2023.
Notísia relevante: http://festifal kultural fronteira sei hala’o iha Maliana
Diretór Jerál SEAK, João F. da Cruz, informa, objetivu hosi enkontru ne’e atu koordena ho Autoridade RAEOA kona-bá planu SEAK nian iha fulan-novembru 2023 sei realiza festivál fronteira ho tema “Interkámbiu Kulturál ba Promove Rekonsiliasaun” iha Munisipiu Bobonaro.
“SEAK mós konvida partisipante hosi RAEOA ba eventu ne’e hamutuk ema na’in-23, entaun ohin ami hosi ekipa SEAK mai atu koordena ho Autoridade sira iha Oé-Cusse,” nia hateten hafoin halo enkontru ho Prezidente Autoridade RAEOA, Arsénio Paixão Bano.
Entretantu, programa interkámbiu kulturál ho ninia objetivu maka atu promove rekonsialiasaun entre Timoroan sira-ne’ebé oras ne’e hela iha Timor Osidentál ho Timoroan sira-ne’ebé hela iha Timor-Leste.
SEAK implementa programa ne’e baseia ba rekomendasaun hosi relatoriu Komisaun Verdade no Amizade (CVA) atu promove rekonsialiasaun liuhosi atividade kulturál hodi hametin liután amizade entre Timoroan ho ita-nia maluk sira iha nasaun viziñu Indonézia.
Notísia relevante: SEAK-CNC atualiza programa interkámbiu kulturál Balibo ba Horta
Jornalista: Abílio Elo Nini
Editor: Agapito dos Santos
