iklan

NASIONÁL, DILI, HEADLINE, MUNISÍPIU

SEAK-CNC atualiza programa interkámbiu kulturál Balibo ba Horta

SEAK-CNC atualiza programa interkámbiu kulturál Balibo ba Horta

Prezidente Repúblika, José Ramos-Horta, enkontru ho SEAK, Jorge Soares Cristovão no Diretór Ezekutivu Centro Nacional Chega (CNC), Hugo Maria Fernandes Iha Palásiu Prezidensiál, Bairru Pité, segunda (04/09). Imajen Tatoli/Egas Cristóvão

DILI, 04 setembru 2023 (TATOLI)Sekretariu Estadu Arte no Kultura (SEAK), Jorge Soares Cristovão, no Diretór Ezekutivu Centro Nacional Chega (CNC,sigla portugués), Hugo Maria Fernandes, segunda ne’e, atualiza programa interkámbiu kulturál ba Prezidente Repúblika, José Ramos Horta iha Palásiu Prezidensiál Bairro-Pité Dili.

Programa interkámbiu kulturál ho ninia objetivu maka atu promove rekonsiliasaun entre Timoroan sira ne’ebé oras ne’e, hela iha Timor-Osidentál no Timoroan sira ne’ebé hela iha Timor-Leste.

Notísia Relevante :CNC inaugura “Uma Memória Esperansa” ba vítima Alola iha Covalima

“Ami mai hato’o ba Prezidente Repúblika kona-ba preparasaun interkámbiu kulturál promove rekonsiliasaun ne’ebé sei hala’o iha aréa fronteira iha fulan oin,” Jorge Soares Cristovão, hateten ba jornalista sira.

Governante ne’e esplika programa interkámbiu kulturál ne’e sei hala’o ho atividade sira hanesan semináriu ne’ebé sei foka kona-ba rekonsiliasaun no inter-kulturál, festivál kulturál, vizita sitíu istóriku no seluk tan.

“Kulturál nian mak ita sei halo semináriu ne’ebé partisipa hosi ita-nia maluk balun hosi Timor-Osidentál no Timoroan rasik hodi ko’alia kona-ba istoria webiku-wehale nian. Atividade ne’e ita sei konvida munisípiu Bobonaro, Covalima no Reziaun Administrativa Espesiál Oé-Cusse Ambeno (RAEOA), sira mak partisipa tanba ita ko’alia kona-ba interkámbiu fronteira,” Sekretariu Estadu ne’e hateten.

Iha fatin hanesan, Diretór Ezekutivu CNC, Hugo Maria Fernandes, reforsa atividade ne’e realiza ho objetivu  maka atu hametin liután relasaun entre Timoroan sira iha Timor-Leste no Indonézia.

“Atividade ne’e atu hametin relasaun Timoroan sira agora daudaun hela iha ne’e no balun hela iha Timor-Osidentál liuliu atu hametin liután hosi aspetu kultura nian, aspetu polítika nian,” Hugo dehan.

Hugo informa atividade ne’e realiza hetan mós orientasaun husi Xefe Estadu, José Ramos Horta. Kona-ba fundu orsamentu hira maka sei gastu iha programa ne’e, nia hateten sei iha faze preparasaun orsamentál tanba ne’e, seidauk bele públika ba públiku.

Tuir oráriu atividade ne’e sei realiza iha 26 to’o 28 fulan-outubru 2023 iha postu administrativu Balibo, munisípiu Bobonaro.

Notísia Relevante :CNC, I.P realiza semináriu kona-ba kura kanek vítima violasaun direitu umanu pasadu

Jornalista: Hortencio Sanchez

Editór       : Agapito dos Santos

iklan
iklan

Leave a Reply

iklan
error: Content is protected !!