BALI, 12 outubru 2023 (TATOLI)–Primeiru-Ministru (PM), Kay Rala Xanana Gusmão, informa, daudaun ne’e ekipa hosi Gabinete Fronteira Marrítima no Terrestre ou Land Maritime Boundaries Office (LMBO, sigla inglés) no ekipa hosi Indonézia hahú fali diskute fronteira terrestre.
“Diskusaun la’o hela, LMBO daudaun iha hela Bali, ami mai hamutuk ha’u filafali ba Timor, sira sei kontinua iha Bali hodi hamutuk ho tékniku Indonézia hodi diskute, tanba ida-ne’e kompromisu mós hosi Governu Indonézia. Ita husu boot hodi hakotu tiha problema fronteira terrestre ne’e,” Xefe Governu hateten hafoin partisipa reuniaun nível a’as Archipelagic and Island States Forum (AIS Forum), iha Bali-Indonézia, kinta ne’e.
Notísia relevante : MNEK : Fronteira terrestre ho Indonézia sai asuntu prioridade
Nune’e, hafoin ekipa sira finaliza diskusaun téknika país rua ne’e maka sei avansa ba asinatura akordu, ne’ebé tuir planu sei hala’o iha Jakarta-Indonézia.
Entretantu, Xefe Negosiadór Prinsipál Timor-Leste, Kay Rala Xanana Gusmão, antes ne’e ho Ministru Koordenadór ba Asuntu Polítiku no Defeza, Wiranto inklui Ministru Negósiu Estranjeiru no Kooperasaun Indonézia, Retno Marsudi, asina ona nota aseitasaun ba finalizasaun fronteira terrestre.
Liuhosi aseitasaun ne’e konsege konklui ona fronteira terrestre iha segimentu rua hanesan Noelbesi-Citrana no Bijael Sunan-Oben.
Área Noelbesi-Citrana hanesan fronteira ho Kupang Nusa Tengara Timur (NTT) no Oé-cusse Ambeno hanesan parte Timor-Leste.
Nune’e mós, Bijael Sunan-Oben hanesan fronteira Tengah Utara ne’ebé sai parte hosi NTT no Oé-cusse Ambeno ho medida ektare 142,7.
Jornalista : Antónia Gusmão
Editora : Julia Chatarina
