BALI, 12 outubru 2023 (TATOLI)—Primeiru-Ministru (PM), Kay Rala Xanana Gusmão, hala’o reuniaun kortezia ho ninia omólogu, Primeiru-Ministru São Tomé e Príncipe, Patrice Émery Trovoada, hodi ko’alia kona-ba problema rekursu umanu.
Xefe Governu rua hasoru malu, hafoin partisipa iha reuniaun nível a’as Archipelagic and Island States Forum (AIS Forum), ne’ebé realiza iha Sentru Konvensaun Nusa Dua Bali, kuarta (11/10).
“Nia (Patrice Émery Trovoada) temi oitoan kona-ba sira-nia perspetiva atu harii universidade hamutuk ho Brazíl iha sira-nia nasaun. Universidade ida ne’ebé hanorin matéria ne’ebé di’ak hodi prepara jerasaun foun. Informa hela ba ita, ne’ebé ha’u dehan ne’e di’ak no haree tok ba. Tanba sira mós preokupadu tebes ho rekursu umanu ne’ebé susar oitoan, sira-nia kondisaun defísil liu ita, maski ukun-an tiha ona iha tinan 1975,” Xanana haktuir.
Notísia relevante : PPN sei reprezenta PR partisipa simeira CPLP iha São Tome e Principe
Nune’e, São Tomé e Príncipe agradese tebes ho apoia ne’ebé Timor-Leste fó ba sira hodi realiza konferénsia Komunidade Nasaun Lian Portugés (CPLP, sigla portugés) antes ne’e ho prezensa hosi Xefe Estadu no Xefe Governu. Nune’e, Timor-Leste reprezenta hosi Prezidente Parlamentu Nasionál, Maria Fernanda Lay.
Jornalista : Antónia Gusmão
Editora : Julia Chatarina
