Fevereiru 2024: Timor-Leste sei estabelese embaixada iha EAU

ABUDABI, 13 outubru 2023 (TATOLI)—Prezidente Repúblika (PR), José Ramos Horta, hatetentuir planu iha fevereiru tinan (2024) oin Timor-Leste (TL) sei estabelese nia embaixada iha Emiradu Árabe Unidu (EAU) tanba ida-ne’e importante tebes.

Notísia Relevante: PR Horta-Prezidente EAU diskute hametin kooperasaun iha área investimentu

“Iha tempu badak, ha’u hanoin iha fevereiru *2024) atu loke ona tanba iha ministéiru tau tiha ona orsamentu. Konforme ha’u ko’alia ho Ministru Negósiu Estranjeiru atu loke embaixada iha ne’e. Prioritáriu ko’alia kle’ur tiha ona, sira prepara daudaun tiha ona fatin no agora atu entrega ba ita,” PR Horta hateten hafoin ramata enkontru ho Prezidente Emiradu Árabe Unidu (UAE, siglá inglés), Liurai Sua Majestade, Sheikh Mohamed bin Zayed Al Nahyan, iha Abudabi, sesta ne’e.

PR Horta prefere, nia parte sei haree tenke Embaixadór ida badinas book-aan hodi halo diplomásia ho formasaun akadémika no esperénsia profisional di’ak no kualidade.

“Hau sei haree ho ministru (MNEK) no Primeiru-Ministru (PM). La’ós Prezidente mak halo desizaun ba ida-ne’e. Prezidente mak fó pose, maibé PM daudaun ne’e ami ko’alia kona-ba embaixada, nia kuaze hosik ha’u de’it mak ko’alia ho Ministru MNEK deside lala’is no hili elementu ne’ebé ho kualidade,” nia hateten.

Tuir nia, Ministéiru Negósiu Estranjeiru no Kooperasaun (MNEK) haree hotu tiha ona ekipa téknika no elementu maibé sira oferese Embaixada ba ita la selu.

Jornalista : Nelson de Sousa

Editór       : Cancio Ximenes