DILI, 13 outubru 2023 (TATOLI) – Orsamentu alokadu ba Uma Naroman ba Povu (UNP) tinan 2021 no 2022 sei iha millaun $32, tanba ne’e Ministru Administrasaun Estatál, Tomás Cabral, hatete atu kontinua UNP 2023 tenke ezekuta hotu verba antes ne’e.
“Tanba ne’e mak iha 2023 ho osan millaun $75 ne’e ita para lai. Se osan iha hela ho montante miliaun $32 nusa lahalo hotu tiha lai”, dehan ba jornalista sira, iha Ministériu Administrasaun Estatál, Colmera, ohin.
Nia dehan programa UNP iha tinan 2021 aloka orsamentu hamutuk millaun $21 no iha tinan tuirmai millaun $64.
“Osan millaun $21 ne’e projetu 100% ezekutadu, gasta millaun $19 no hela millaun $2, tanba ne’e mak ha’u husu sekretariadu Estadu ho vise-ministru atu bá haree no hasai hodi halo uma ba povu ne’ebé mak presiza. Tanba orsamentu ne’e transfere husi Ministériu Finansa mai Estatál, maibé ba direitamenta konta bankária suku nian”, dehan.
Kona-ba orsamentu UNP 2022 ne’e ezekuta ona millaun $30-resin no restu hela millaun $29-resin. Ba ida ne’e, governante husu ba Programa Nasionál Dezenvolvimentu Suku (PNDS) iha munisípiu sira bele esplika tanba sá mak osan transferénsia públika labele ezekuta hotu.
“Ha’u bá Vemasse [haree UNP] maibé odamatan seidauk tau, balun seidauk prienxe sasán ba laran. Be osan haruka ba ne’e bá ne’ebé? Osan sei iha millaun $32. Ami informa ona ba kraik katak to’o 31 dezembru tenke rezolve problema ona”, ministru kestiona.
Nia salienta katak funsionáriu PNDS kontratadu no kazuál sira iha munisípiu ne’ebé halo kontrolu ba UNP iha 335 no kada postu administrativu hamutuk ualu, maibé labele kontrola ida ne’e.
“Osan transferénsia públika ne’e sei iha hela konta suku nian no sei la lakon, maibé ta’uk mak kompozisaun iha kraik ne’ebé mak halo pagamentu konstrusaun atu troka. Se atu truka halo kedas subtituisaun nune’e osan ne’e uza to’o hotu. Tanba ita haree uma barak mak seidauk hotu no barak mak seidauk entrega”, katak.
Notísia relevante: Responsável projetu hahú halo konstrusaun UNP lima iha suku Maluru Viqueque
Jornalista: Osória Marques
Editora: Maria Auxiliadora