iklan

INTERNASIONÁL, POLÍTIKA

Prezidente EAU aseita pedidu PR Horta harii rezidénsia universitáriu iha TL

Prezidente EAU aseita pedidu PR Horta harii rezidénsia universitáriu iha TL

Prezidente Repúblika (PR), José Ramos Horta, sesta (13/10/2023) ne’e, iha nia vizita ofisiál ba loron dahuluk hasoru malu ho nia ómologu Prezidente Emiradu Árabe Unidu ka United Arab Emirabes (UAE), Liurai Sua Majestade, Sheikh Mohamed bin Zayed Al Nahyan, hodi hametin relasaun bilaterál no oinsá aumenta kooperasaun liuliu iha área investimentu iha Timor-Leste (TL). Imajen/Mídia PR.

ABUDABI, 13 outubru 2023 (TATOLI)—Prezidente Emiradu Árabe Unidu (EAU), Liurai Sua Majestade, Sheikh Mohamed bin Zayed Al Nahyan, aseita pedidu Prezidente Repúblika (PR), José Ramos Horta, atu apoiu harii rezidénsia universitáriu iha Timor-Leste.

Notísia Relevante: Embaixadór EAU simu PR Horta iha Dubai

Hosi Abudabi, jornalista Agência Tatoli Nelson de Sousa relata, Xefe Estadu TL hateten ba liurai boot Prezidente Abudabi no UAE tinan 20 nia laran mak mehi ba buat ida, mak nia konta kondisaun universitáriu timoroan liuliu joven sira maihosi foho (munisípiu) mai eskola hela iha Dili, hodi sena malu iha kuartu ida ho bee moos, sintina no dapur laiha.

Prezidente Repúblika (PR), José Ramos Horta, sesta (13/10/2023) ne’e, iha nia vizita ofisiál ba loron dahuluk hasoru malu ho nia ómologu Prezidente Emiradu Árabe Unidu ka United Arab Emirabes (UAE), Liurai Sua Majestade, Sheikh Mohamed bin Zayed Al Nahyan, hodi hametin relasaun bilaterál no oinsá aumenta kooperasaun liuliu iha área investimentu iha Timor-Leste (TL). Imajen/Mídia PR.“Ha’u ko’alia ida-ne’e ba nia, no nia hateten ha’u (Prezidente Emiradu Árabe Unidu) konkorda. Kuandu ami ramata nia hateten buat hotu-hotu ita ko’alia ha’u apoiu. Maibé, ida ha’u (Prezidente UAE) gosta liu mak ida-ne’e ha’u sei halo. Depois, ha’u hateten ba nia, hau’ bele haruka karta pedidu ida ba ita-boot para formaliza, maibé nia hateten lalika no la presiza. Ha’u hatene ona, harii rezidénsia universitáriu,” PR Horta hateten hafoin ramata enkontru ho Prezidente Emiradu Árabe  Unidu (UAE, siglá inglés), Liurai  Sua Majestade, Sheikh Mohamed bin Zayed Al Nahyan, iha Abudabi, sesta ne’e.

Tanba ne’e, hafoin vizita ida-ne’e Prezidente Repúblika José Ramos Horta fila-fali ba Dili, sei ba haree no buka rai hodi bele implementa programa ida-ne’e, tanba nia parte kontente ho desizaun hosi Prezidente Federasaun Abudabi Emiradu nian.

“Nia ema ida di’ak. Ha’u koñese nia istória maibé sira hatene ha’u iha 2021, 2022 ha’u hola parte sai juri (panel) internasionál prémiu fraternidade umana ne’ebé hahú no hala’o iha ne’e,” Horta hateten.

Horta dehan. iha primeiru Governu Konstitusionál kedas hakarak defende preokupasaun ne’e halo buat ruma, nune’e uluk hato’o ba Ministéiru Edukasaun atu haree rezidénsia universitária maibé la konsege.

“Entaun, ohin, ha’u hateten ba Liurai favór ha’u-nia pedidu ida de’it ba ita, buat sira seluk bele halo tuir hanesan investimentu, bele halo impréstimu. Favór halo rezidénsia universitáriu ne’e tenke kampaun ida, tenke buka rai, estudante sira-ne’ebé mai hosi foho prioridade fatin laiha atu hela, sira hela iha rezidénsia universitária ne’e,” nia dehan

Tui rnia, rezidénsia ne’e rai bara-barak iha no la’ós buat ida foun, estudante sira bele hela iha ne’eba, balun iha kuartu ida estudante na’in-rua ka tolu hela klaru ho kama, haris fatin no tenke iha sentru médiku no biblioteka eletróniku, internet, kampu desportu, nune’e sira iha vontade atu estuda

Tuir planu, Horta hateten, rezidénsia universiáriu ne’e sei entrega ba madre sira mak halo jestaun hodi jere rezidénsia ne’e.

Tanba ne’e, tuir nia, iha sábadu (14 outubru) ne’e, PR Horta sei hao enkontru ho ministru tau matan ba área ne’ebé temi hodi ko’alia kle’an liután kona-ba kestaun ne’e.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!