OÉ-CUSSE, 12 outubru 2023 (TATOLI)-Autoridade RAEOA liuhosi Sekretária Rejionál ba Asuntu Edukasaun no Solidariedade Sosiál no Inkluzaun, servisu hamutuk ho parsériu UNDP hodi harii tanke públiku iha eskola 13 no fasilidade saúde tolu hodi halo akaptasaun ba udan-been iha tempu udan.
Notísia relevante: RAEOA harii debu naturál sia konserva udan-been atu haforsa bee-matan
Prezidente Autoridade RAEOA, Arsénio Paixão Bano, hateten Autoridade Rejiaun Autónomu Espesiál Oé-Cusse (RAEOA) koopera ho United Nations Development Programme (UNDP) atu rezolve problema falta bee moos no hadi’a fasilidade saude iha aréa remota.
“Ita harii atu rezolve problema balun ne’ebé durante e’e eskola sira menus bee iha eskola inklui fasilidade saúde sira, entaun iha tinan kotuk no tinan ida-ne’e ita prioritiza ba kaptasaun udan-been iha eskola 13, nune’e bele uza ba tempu bailoron,” Arsénio Bano, hateten ba Tatoli iha Oé-Cusse, kinta ne’e.
Prezidente Autoridade ne’e esplika RAEOA iha ninia planu prioridade ida maka atu mellora fasilidade sira iha eskola liuliu kestaun bee moos hodi fasilita programa merenda eskolár no sanitasaun públiku, tanba ne’e sei konstrui tan tanke públiku iha fatin seluk tan.
“Tan ne’e akaptasaun udan-been atu di’ak, dirijente eskola sira sei ajuda atu prezerva bee ua’inhira iha tempu udan mai, tanba kapasidade tanke balun akumula bee 110m3 bele uza to’o fulan-ualu tanba Oé-Cusse enfrenta problema bee-moos, entaun ho estratéjia ida-ne’e ita-bele halo kaptasaun iha tempu udan,” nia hateten.
Entretantu, eskola 13 ne’ebe RAEOA ho UNDP harii ona tanke iha sub-rejiaun Pante Makasar, harii iha eskola EBC Boboloa suku Bobokase ho médida tanke 110m3, EBF Maquelab suku Taiboko ho 92m3.
Nune’e iha EBF Noapai iha suku Cunha ho medida 92m3, EBF no EBC Baqui suku Naimeko ho medida 110m3, EBC Tula-Ika suku Lifau 150m3, no EBC no EBF Oélkaem ho medida 110m3 suku Taiboko.
Iha sub-rejiaun Oésilo hari’i iha EBF Oébaha medida 92m3, EBC no ESG Oésilo 150m3, no EBF Oésilo 92m3, perténsia suku Bobometo.
Iha sub-rejiaun Nítibe, hari’i iha EBF Noetoko ho medida 92m3 iha suku Ban-Afi, EBF no EBC Haobeno 110 m3, EBF Netenbitimo Mahata 92m3 perténsia suku Lela-Ufe.
Kona-bá fasilidade saúde sira hanesan, iha sub-rejiaun Pássabe hari’i iha postu saúde Haemnanu suku Abani ho medida 49m3.
Iha sub-rejiaun Pante Makasar hari’i iha postu saúde Maquelab ho medida 49 m3, postu saúde Oélkaem 110m3, perténsia suku Taiboko no sentru saúde Baqui ho medida 49m3 iha suku Naimeko.
Purtantu, projetu ne’e konstrui hosi empreza Paul Eletrik Unipesoál Lda, ho valór kontratu hamutuk $417,597.34 ho durasaun servisu tinan ida sei konklui iha janeiru 2024.
Notísia relevante:RAEOA implementa tán merenda eskolár faze daruak ba loron efetivu 40
Jornalista: Abílio Elo Nini
Editor: Agapito dos Santos
