Solidariedade Sosiál Covalima apoia foos saku rihun 2-resin ba grupu vulneravel
COVALIMA, 13 outubru 2023 (TATOLI) – Iha janeiru to’o setembru, Sentru Solidariedade Sosiál no Inkluzaun (SSI) Covalima apoia ona foos saku 2.086 ba grupu vulneravel iha postu hitu iha munisípiu refere.
Diretór SSI Covalima, Agapito Cardoso, hatete ajuda ne’e halo bazeia ba pedidu husi xefe suku sira.
“Ami-nian programa fó asisténsia umanitária ba grupu vulneravel sira hanesan família kbiit-la’ek, ema ho difisiénsia, instituisaun solidariedade sosiál, estudante estajiáriu, asosiasaun kombatente, vítima violénsia bazeia ba jéneru no eis prezu sira”, dirijente hatete iha nia serbisu fatin iha Suai Loro, ohin.
Tuir dadus, iha trimestre dahuluk SSI disponibiliza foos saku 722, daruak 840 no datoluk 524. Totál benefisiáriu benefisiáriu hamutuk 4.098 – mane 2.425 no feto 1.673. Daudaun stock foos iha armazein Sentru Solidariedade Sosiál hamutuk saku 300-resin.
Notísia relevante: SSSI Covalima fó prioridade ba programa 5
Jornalista: Celestina Teles
Editora: Maria Auxiliadora
