iklan

MUNISÍPIU, VIQUEQUE

Unidade Tránzitu Viqueque rekolla koima $3.022 durante fulan-tolu

Unidade Tránzitu Viqueque rekolla koima $3.022 durante fulan-tolu

Komandante PNTL munisípiu Viqueque, Superentendente João da Costa. Imajen Tatoli/Vitorino Lopes da Costa

VIQUEQUE, 13 outubru 2023 (TATOLI)Polísia Nasionál Timor-Leste (PNTL) liuhosi Unidade Tránzitu konsege rekolla koima $3.022 ba kofre Estadu, durante fulan-tolu.

“Hahú hosi ha’u-nia mandatu iha fulan-jullu to’o setembru, seguransa ba rodoviáriu, ami konsege rekolla koima hosi infrasaun sira hamutuk $3.022 ba kofre Estadu. Ita hareee reseita ne’e menus tanba ita-nia infrasaun liu-liu transporte hanesan karreta asesu mai Viqueque ladún kompara ho munisípiu seluk. Maski ami halo pasa revista kada loron, maibé reseita ki’ik,” Komandante PNTL munisípiu Viqueque, Superentendente João da Costa, informa iha ninia knaar fatin, Komandu PNTL Viqueque, Beskem, sesta ne’e.

Notísia relevante : PNTL Viqueque rekolla koima infrasaun $363 durante jullu

Nune’e, Unidade Tránzitu kontinua halo operasaun hodi utilizadór dalan sira bele kumpre regra

“Ba oin ami kontinua implementa pasa revista ba transporte públiku no motorizada sira ne’ebé hala’o movimentu iha Viqueque no fó sosializasaun regra ba sidadaun sira atu sira bele kompreende hodi evita asidente no labele viola regra rodoviáriu nian,” nia akresenta.

Aleinde ne’e, PNTL observa durante fulan-tolu asidente ladún iha tanba kondisaun estrada.

“Ita rejista asidente lima no ida maka mate ho motorizada, enkuantu asidente seluk kanek kama’an. Nune’e husu ba utilizadór transporte públiku no privadu sira bainhira utiliza transporte karik tenke kumpre regra sira atu nune’e bele redús asidente iha dalan,” nia fó hanoin.

PNTL munisípiu Viqueque sei kontinua implementa regra tuir dekretu-lei númeru 06/2003 kona-ba rejime tránzitu hodi kondena ema sira ne’ebé viola kódigu estrada.

Jornalista     : Vitorina Lopes da Costa
Editora          : Julia Chatarina

iklan
iklan

Leave a Reply

iklan
error: Content is protected !!