VIQUEQUE, 15 outubru 2023 (TATOLI)—Serbisu Edukasaun Munisípiu Viqueque, domingu ne’e, distribui pontu ezame nasionál 2023 ba postu adiministrativu lima no daudaun ne’e sei asegura hela iha edífisiu Polisia Nasionál Timor Leste (PNTL).
Notísia Relevante: Servisu Edukasaun Viqueque rejista estudante 3.402 sei partisipa ezame nasionál
Diretór Serbisu edukasaun Viqueque, Domingos Brandão, hateten ba ezame nasionál ne’e serbisu edukasaun distribui ona pontu ezame nasionál ba postu Ossu, Uatulari, Uatukarbau no agora kontinua distribui ba postu Lakluta.
“Preparasaun ezame nasionál ba tinan anu letivu 2023, hahú horisehik ami distribui ona ba postu adiministrativa haat no agora ami kontinua distribui ba postu Lacluta no pontu ezeme sira sei asegura eskuadra PNTL,” Domingos Brandão hateten ba Agência Tatoli, iha postu Viqueque Vila.
Ezame nasionál sei hahú segunda (16 outubru 2023) aban to’o sábadu, nune’e pontu ezame nasionál ba estudante ensinu báziku, sekundáriu jerál no Tekniku Vokasionál sei asegura hotu iha eskuadra PNTL.
“Aban ne’e profesór sira mak halo koordenasaun no molok tuku hitu dadeer, profesór sira ba foti iha eskuadra PNTL hodi fó ezame ba ita-nia estudante sira iha munisípiu Viqueque,” nia dehan.
Nia dehan, pontu ezame nasionál bazeia númeru estudante husi ensinu báziku, sekundáriu no Tekniku Vokasionál sira ne’ebé atu tuir ezame nasionál hamutuk rihun 3.402.
Tuir dadus, nia dehan, estudante sira-ne’ebé partisipa ba ezame nasionál kompostu hosi EBC na’in-1.925 okupa sala hamutuk 110, ESJ kompostu hosi siénsia teknólojia (CT) totál na’in 780, siénsia sosiál umaniora (SSH) na’in 587 sei okupa sala 34 no ETV hosi departamentu informatika na’in-32 no departamentu agararia hamutuk na’in-78 ho totál hamutuk na’in-110 sei okupa sala hitu (7).
Jornalista : Vitorino Lopes da Costa
Editóra : Cancio Ximenes
