SEGURANSA, VIQUEQUE

MJ disemina lei tráfiku umanu ba abitante Viqueque

MJ disemina lei tráfiku umanu ba abitante Viqueque

Atividade diseminasaun lei tráfiku umanu iha salaun administrasaun munisípiu Viqueque, segunda (16/10/2023). Imajen Tatoli/Vitorino Lopes da Costa

VIQUEQUE, 16 outubru 2023 (TATOLI)Ministériu Justisa (MJ) liuhosi Komisaun Luta Kontra Tráfiku Umanu, segunda ne’e, disemina dekretu-lei númeru 9/2021 kona-ba tráfiku umanu ba abitante munisípiu Viqueque.

Inisiativa ne’e ho objetivu atu halo prevensaun no kombate krime tráfiku umanu, prosesu kazu no reforsa intituisaun liuhosi habelar informasaun, monitorizasaun inklui diseminasaun papel komisaun iha rejiaun.

“Kazu tráfiku umanu kontinua buras. Eziste ona iha ita-nia nasaun, timor-oan na’in-200 resin sai vítima ba tráfiku umanu iha tinan 2022, iha Portugal toba iha jardín tanba sira la hatene informasaun ne’ebé ema bosok sira tanba menus koñesimentu, ema fó promesa dehan ba Portugal sei hetan serbisu, maibé realidade laiha,” Reprezenta MJ no atuál Diretór Jerál, Flaviano Moniz Leão, hateten, durante atividade iha salaun administrasaun munisípiu Viqueque, segunda ne’e.

Nia haktuir, timor-oan sira bá Portugal tenke hatama osan $3.000 no balun $ 4.000 ba ajénsia sira ne’ebé trata viajen, maibé hafoin to’o destinasaun laiha serbisu.

“Situasaun sira-ne’e maka akontese ba ita-nia sidadaun sira ne’ebé agora iha Portugal maibé balun maka fila ona mai Timor. Iha fulan setembru 2023 ami ba vizita timor-oan sira iha Portugal hodi haree no nota katak kondisaun difísil tebes,” nia relata.

Notísia relevante : Horta konsidera timoroan toba iha jardin Portugál tanba la organiza an

Kondisaun ne’e sai preokupasaun ba entidade hotu inklui Governu, nune’e komisaun halo esforsu atu situasaun ne’e labele akontese tan iha futuru.

“Ajénsia sira-ne’ebé halo rekrutamentu ba timor-oan sira daudaun balun tama ona ba prizaun preventiva no balun sei iha prosesu investigasaun iha Ministériu Públiku. Ita tenke fó sansaun ba ema ne’ebé halo rekrutamentu ba timor-oan sira. Tanba ne’e hanesan ita hotu nia kontribuisaun no responsablidade atu ba futuru buat sira-ne’e labele akontese,” nia tenik.

Biban ne’e, nia husu ba autoridade munisípiu Viqueque atu habelar informasaun sira, liu-liu kona-ba tráfiku umanu, nune’e Viqueque-oan sira labele monu ba risku.

Iha fatin hanesan, Autoridade munisípiu Viqueque, Januário Soares ‘Bolly’, agradese ba Komisaun Luta Kontra Tráfiku Umanu, ne’ebé ho inisiativa disemina informasaun hodi abitante sira bele iha koñesimentu no halo prenvensaun ba ida-idak nia-an.

Atividade ne’e realiza durante loron-rua, hahú segunda no tersa, ne’ebé hetan partisipasaun hosi autoridade lokál, diretór liña ministeriál, inklui diretór servisu munisípiu Viqueque.

Tuir dadus hosi Komisaun Kontra Tráfiku Umanu, timor-oan 731 sai ona vítima, hahú hosi tinan 2016 to’o 2022.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!