COVALIMA, 16 outubru 2023 (TATOLI) – Sentru Solidariedade Sosiál (SSI) Covalima halo pagamentu Bolsa da Mãe Jerasaun Foun ba benefisiáriu na’in-4.990 ho totál orsamentu $115.285.
Pontu fokál Bolsa da Mãe Jerasaun Foun, Nelson de Jesus, hatete pagamentu ba benefisiáriu sira ne’e halo iha sentru saúde hitu no postu saúde 24 no halo fazeadamente liuhusi mosan tuir kalendáriu.
“Pagamentu ne’e ba fulan-jullu nian no kada benefisiáriu simu $20. Ba agostu to’o setembru seidauk halo pagamentu”, informa iha nia knaar fatin iha Suai Loro, ohin.
Tuir dadus SSI, benefisiáriu bolsa da mãe husi postu administrativu Fatululik hamutuk 165 (ho nia orsamentu $4.360), sentru saúde Fatumea 269 ($6.410), sentru saúde Fohorem 327 ($7.705), Maucatar 801 ($18.115), Suai Vila 1.643 ($38.695), Tilomar 682 ($14.960), Zumalai 1.103 ($5.040).
Rekorde katak Governu halo ona abertura ba pagamentu bolsa da mãe jerasaun foun iha Covalima iha loron 06 fulan-juñu tinan ne’e.
Notísia relevante: Reajustamentu dadus benefisiáriu bolsa da mãe kondisionál iha Covalima hamutuk 3.311
Jornalista: Celestina Teles
Editora: Maria Auxiliadora
