DILI, 16 outubru 2023 (TATOLI)—Delegasaun hosi sidade rua hanesan Merri-Bek no Hume, Austrália, ne’ebé halibur malu iha The Friends of Aileu Community Committee, hasoru malu ho Primeiru-Ministru, Kay Rala Xanana Gusmão, hodi relata progresu serbisu ne’ebé sira durante ne’e halo ona iha Timor-Leste, liu-liu iha munisípiu Aileu.
“Ami agradese ba Primeiru-Ministru, ba nia amizade, nia laran di’ak, nia solidariedade no serbisu hotu ne’ebé nia halo atu apoia nasaun Timor-Leste no nia relasaun di’ak ho Austrália. Ami iha planu atu kontinua relasaun ne’e forte liu fali, ami sempre buka oportunidade maibé depende ba povu Aileu,” Konselleiru sidade Merri-Bek, Joseph Haweil, hateten hafoin harosu malu ho Xefe Governu, iha Palásiu Governu, segunda ne’e.
Nia dehan, sira-nia prezenta iha Timor-Leste atu hatudu relasaun di’ak no importante entre país rua, liu-liu komunidade sira.
“Onra boot tebes ami hasoru malu ho Primeiru-Ministru. Ami hosi Konsellu sidade Hume no sidade Merri-Bek, ami iha ne’e nu’udar parte hosi relasaun ho AIileu nian, ne’ebé iha ona tinan 20 resin entre ami-nia munisípiu rua iha Melbourne-Austrália no Aileu,” nia akresenta.
Notísia relevante : Estrada ligasaun Aileu-vila ba Lequidoe no Remexio hatuur ona fatuk dahuluk
Apoia sira ne’ebé durante parseiru dezenvolvimentu halo ona iha munisípiu Aileu maka iha área edukasaun no kapasita joven sira iha área permakultura.
“Ami apoia grupu sira hanesan sentru formasaun rekursu Aileu, ezemplu ami-nia parseiru prinsipál ida iha área ne’e no ami hakarak tebes atu kontinua relasaun la’ós de’it ba tinan-lima oin mai maibé ba tinan barak atu mai iha futuru,” nia tenik.
Iha biban hanesan, Konselleiru sidade Merri-Bek, Mark Riley, akresenta, durante ne’e ekipa iha relasaun di’ak ho komunidade lokál.
“Ida-ne’e relasaun amizade entre ema, ami tulun maibé povu Aileu mós eduka no lori ami ho sira hodi deside saida mak prioridade no ami tulun atu rekursu ne’ebé ami ajuda atu finansia no ami troka amizade, troka abilidade, troka ideia sira no ami-nia relasaun ne’e forte tebes. Primeiru-Ministru subliña katak, relasaun ida-ne’e mak relasaun boot ida, ne’ebé nasaun barak seluk bele apreende. Tanba ne’e, ami sente orgullu tebes ho situasaun hanesan ne’e,” nia salienta.
Aleinde ne’e, komunidade ne’e apoia mós sistema bee-moos no kapasita rekursu umanu liuhosi apoia bolsa estudu.
“Área sira ne’ebé ami fó apoia ba ne’e sira (populasaun Aileu) mak deside no prioridade sira mak ami apoia bazeia ba ida-ne’e. Ami komprometidu atu apoia nafatin sira iha tempu mai, maibé depende ba sira,” Mark Riley dehan.
The Friends of Aileu Community Committee hanesan grupu ne’ebé serbisu hamutuk ida hosi Konsellu sidade Merri-Bek no sidade Hume, ne’ebé ajuda informa ba konsellu rua kona-ba relasaun amizade liuhusi fó oportunidade ba komunidade nia input no liuhosi feedback regulár.
Komisaun ne’e kolabora besik ho organizasaun parseiru sira no membru komunidade iha Merri-Bek no Hume hodi organiza atividade foti fundu no hasa’e konsiénsia, ne’ebé ninia foku atu apoia projetu no inisiativa oin-oin iha Aileu.
Asinatura akordu kooperasaun entre Timor-Leste ho The Friends of Aileu Community Committee realiza ona desde tempu UNTAET, iha loron 04 maiu 2000.
Jornalista : Antónia Gusmão
Editora : Julia Chatarina
