COVALIMA, 17 Outubru 2023 (TATOLI)—Administradór postu sdministrativu sira iha munisípiu Covalima preokupa ba buletin votu ba xefe aldeia sira la uza fotografia no tau de’it xefe aldeia sira-nia naran.
Notísia Relevante: Kandidatu xefe suku iha territóriu nasionál hamutuk 2.117
“Ami simu preokuapasaun hosi eleitór sira kona-ba buletin votu, tanba buletin votu xefe aldeia, delgada ho delgadu iha buletin votu laiha fotografia,” Administradór postu Tilomar, Bendito Maia, hato’o preokupasaun ne’e iha salaun CNE Covalima, tersa ne’e
Razaun eleitór sira preokupa tanba ba eleitór sira-ne’ebé lahatene lee ne’e defisil, tanba ho foto mak bele fasilita eleitór sira atu votu hili delgada no delgadu tuir sira-nia hakarak.
Administradór postu administrativu Fatumea, Geraldo Orleans reforsa, presiza hala’o edukasaun sívika ba eleitór-sira kona-ba buletin votu nune’e eleitór sira bele komprende.
“Ami haree hamosu fallansu uitoan, ami haree bulletin votu ida-de’it maibé ita hili delgadu ho delgada hamutuk iha buletin votu ida no laiha foto,” nia hateten
Nia husu presiza halo edukasaun sívika ba eleitór, nune’e sira bele komprende ba vota hodi hili xefe aldeia, delgada ho delgadu sira tuir sira-nia hakarak.
Prezidente CNE, José Belo, klarifika iha buletin votu ba xefe aldeia sira la uza fotografia maibé sei taka iha kaudru nune’e molok eleitór sira vota haree uluk xefe aldeia sira-nia fotografia hafoin eleitór sira hili.
“Lei suku buat balun sai preokupasaun hanesan foto xefe aldeia sira, tanba barak difikulta liuliu ema ho defisiénsia no labele haree, maibé lei la iha mudansa ita ajuda tau foto grafia iha kuadru sira bele ajuda ferik-katuas sira bele fó sira-nia votu,” nia dehan.
Ho nune’e, Komisaun Nasionál Eleisaun (CNE-Sigla Portugés) Sekretáriu Tékniku Administrasaun Eleitór (STAE) hamutuk ho administradór postu sira, servisu makaas atu promove xefe aldeia sira momentu sira halo introdusaun.
Tuir kalendáriu Eleisaun Suku sei hala’o iha sábadu (28 outubru 2023), nune’e iha loron sesta (13 outubru 2023) kadidatura xefe suku sira submete ona sira nia dkumentu atu kompete iha eleisaun suku.
Jornalista : Celestina Teles
Editór : Cancio Ximenes
