DILI, 16 outubru 2023 (TATOLI)—Ofisiál Supervizaun Eleitorál (OSE) hosi Komisaun Nasionál Eleisaun (CNE, sigla portugés) destaka ba suku sira iha Timor-Leste ne’e, rekolla kandidatu xefe suku hamutuk 2.117 ne’ebé kompostu hosi feto 241 (11,38%) no mane hamutuk 1876 (88,62%).
Notísia Relevante: Konsellu suku iha territóriu nasionál sei simu insentivu kada fulan
Vise Prezidente Komisaun Nasionál Eleisaun (CNE, sigla portugés), Domingos Barreto, hateten hosi dadus ne’ebé destakadu CNE rekolla ne’e posibilidade boot sei hakat ba eleisaun segunda ronda tanba kada suku iha kandidatura na’in rua ba leten.
“Durante ita akompaña iha aprezentasaun lista kandidatura iha meza asembleia suku hatudu ema barak mak iha interrese hodi kompete, tantu feto ho mane. Entaun, haree hosi ne’e sei hakat ba eleisaun segunda ronda. No, aprezentasaun lista kandidatura ba xefe aldeia no delegada-delagadu sei aprezenta iha loron eleisaun 28 fulan-outubru 2023,” Domingos Barreto hateten ba Agência Tatoli iha nia kna’ar fatin CNE, Colmera, segunda ne’e.
Dadus ida-ne’e hatudu katak partisipasaun sidadaun eleitór sira iha Timor Leste, iha entuziasmu ne’ebé boot atu bele kompete iha eleisaun lideransa komunitária ne’ebé demokrátiku no partisipativu.
Eleisaun lideransa komunitária tinan ne’e mós hasa’e partisipasaun joven inklui kandidata feto iha suku ne’e, halo eleisaun suku ne’e sai kompetetivu liután kompara ho eleisaun suku tinan hitu liubá ne’e.
Eleisaun Lideransa Komunitaria sei realiza iha loron 28 fulan-outubru, ne’ebé kada eleitór sei ezerse sira-nia direitu votu iha sira-nia área jeográfika mak define iha kartaun eleitór.
Ida-ne’e haktuir no orientasaun ne’e bazeia ba lei númeru 9/2016, artigu 39, 48 no 68, hateten katak eleisaun ba delegada/u, xefe aldeia no xefe suku sei realiza iha kada aldeia hodi hili membru sira iha konsellu suku.
Iha artigu 65.1 hatete katak, aprezentasaun ba kandidatura xefe suku nian sei realiza iha loron sanulu resin lima molok loron eleisaun, nune’e iha loron 13 outubru tinan 2023, Sidadaun Eleitor eleizivél sira iha territoriu Timor-Leste laran, ne’ebé iha interrese ba kandidatu xefe suku, aprezenta ona sira-nia kandidatura ba meza eleitorál suku iha sira-nia suku ida-idak.
Entretantu, Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten kona-ba prosesu imprime bulletin votu hahú ona horisehik no sei to’o iha 23 outubru 2023.
“Ita emprime ona horisehik no sei to’o iha 23 outubru, no biuletin votu ne’e emprime iha Taibesi nian,” nia hateten.
Notísia Relevante: Eleisaun suku: Meza eleitorál suku simu kandidatura iha 13 outubru
Jornalista : Osória Marques
Editór : Cancio Ximenes
