iklan

NASIONÁL, POLÍTIKA

Eleisaun suku: Meza eleitorál suku simu kandidatura iha 13 outubru

Eleisaun suku: Meza eleitorál suku simu kandidatura iha 13 outubru

Diretór Jerál Sektretariadu Tékniku Administrasaun Eleitorál (STAE), Acilino Manuel Branco. Imajen Tatoli/Osória Marques.

DILI, 15 setembru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten iha prosesu eleisaun suku nian ne’e ho nia prosedimentu tomak ne’ebé regulariza iha dekretu Governu Nú.14/2016, ne’ebé define nia lala’ok iha prosesu tomak fahe ba parte tolu.

Notísia Relevante: Suku foun 10 ne’ebé estabelese iha 2017 la partisipa eleisaun suku

Nia hatutan, prosesu tomak iha eleisaun suku nian mak parte dahuluk ne’e iha loron 13 outubru 2023 ne’e konstitui meza eleitorál suku sei simu kandidatura ba xefe suku de’it iha territóriu nasionál hodi kompete iha eleisaun xefe suku ne’ebé sei realiza iha fulan-outubru 2023.

“Parte daruak nian mak ba iha 28 outubru 2023 ne’e konstitui fali meza asembleia aldeia lori simu kandidatura ba xefe aldeia no mós delegada no delagadu, depois lori kontinua ba iha prosesu votasaun. Kontajen no ba iha prosesu apuramentu rezultadu iha suku ba iha pozisaun xefe suku nian. Parte datoluk mak prosesu meza asembleia Konsellu suku lori hili lia-na’in ho forma tradisionál, ikus mai hili tiha lia-na’in no lori hili fali reprezentante feto no mane,” Diretór STAE ne’e hateten ba Agência Tatoli, iha nia kna’ar fatin Caicoli, kinta ne’e.

Eleisaun suku, nia dehan, hala’o kada faze katak eleisaun hala’o iha 28 outubru depois kandidatura hotu ba xefe aldeia nian, nune’e iha tuku 09h00-15h00 ba prosesu votasaun nian ba hili xefe suku, xefe aldeia, delegada no delagadu, tanba ida-ne’e regula tuir dekretu Governu nian.

Tuir nia, iha 28 outubru hafoin kontajen mak iha suku balun mak nia kandidatura ne’e mak la liu 50+1, entaun segunda volta sei akontese iha 13 novembru 2023, tuir data ne’ebé dekretu Governu aprova liuhosi Konsellu Ministru.

“Maibé ba xefe aldeia nian iha 28 outubru mak laiha kandidatura ida mak liu iha primeira volta mak halo votasaun imediata iha loron hanesan, eleisaun akontese iha tempu hanesan. Depois eleisaun iha 28 outubru ka segunda volta akontese ba xefe suku. Iha enkontru dahuluk ba suku ne’ebé la avansa ba segunda volta ne’ebé ba xefe eleitu ho nia órgaun konsellu suku hanesan xefe aldeia ho delegadu/delegada, hodi reune lori hili lia-na’in ida tuir sira-nia tradisaun ne’ebé iha no hili reprezentante joven feto ho mane,” nia esplika.

Ba suku sira-ne’ebé avansa ba segunda volta iha loron semana rua tuir mai mak 13 novembru, ne’e hein lai tanba halo fali eleisaun ba sira-knia suku maibé dala tan sei akontese nível aldeia ida-ida lori hili tiha lai xefe suku, no enkontru tuir fali mai lori hili fali lia-na’in no reprezentante joven feto no mane.

Kandidatura sira, nia hateten, xefe suku ne’e individu katak prienxe kritériu ne’ebé divulga ona ne’ebé define iha lei no mós define iha dekretu Governu katak individu ida-ida ba presta deklarasaun perante asembleia suku, perante membru prezide meza katak “ha’u mai ho konxiénsia rasik hodi deklara katak kompete ba pozisaun xefe suku”, depois aprezenta lista 1% hosi eleitór suku ho nia dokumentu rekezitu sira seluk.

“Aprezentasaun lista kandidatura la’ós pakote, xefe suku nian aprezenta ketak kada individu ne’ebé iha interrese. Mai fali iha 28 outubru mós hanesan, sidadaun ne’ebé iha interrese pozisaun aldeia individualmente nia ba presta deklarasaun iha meza asembleia aldeia nian. Nune’e mós individu feto ka mane ne’ebé mak kompete pozisaun delegadu-delegada,” nia hateten.

Responsável ne’e hatutan, maibé nia prosesu votasaun mak dala ida de’it ne’ebé eleitór ida sei simu buletin votu oin tolu, buletin votu ba xefe suku ho kor mutin, xefe aldeia ho kor kinur no delegada/delagadu ho kór matak, maibé lia-na’in la uza buletin no ida-ne’e sei uza tuir kostume maibé ida-ne’e depois votasaun ramata.

“Ida-ne’e deside iha dekretu Governu katak buletin votu bele diferensa kór. Entaun, ami deside ona no sei aprova ho diploma Ministerial ida-ne’ebé oras ne’e ami haree hela no loron hirak mai sei aprova. No, bulletin votu oin tolu ne’e sei tau iha urna ida nia laran no ita la uza tinta,” nia dehan.

Feto kompete iha eleisaun suku

Ko’alia kona-ba feto kompete ba eleisaun suku, Diretór Jerál STAE ne’e hateten, tuir lei kandidatura rua tenke iha feto ida maibé kuandu laiha, purtantu deklara ba iha organizasaun feto ne’ebé mak reprezenta ne’ebá, no iha dekretu Governu mós la hateten katak laiha prosesu la kontinua maibé ninia prosesu kontinua la’o.

“Ida-ne’e mós ita ko’alia ho organizasaun feto sira oinsá atu promove, haree sira hahú ona tau sira-nia slogan iha fatin-fatin, la’ós de’it ba kandidatura xefe suku maibé mós ba asembleia sira, lori presta deklarasaun sira no deside hodi prosesu eleisaun ne’e ba oin,” nia hateten.

Agora kona-ba kandidatura hira mak kompete, nia hateten, ne’e depende ba eleitór tanba iha dekretu Governu ne’e hateten 1% hosi eleitór iha kada suku, ida-ne’e todan uitoan mak 1% ne’e maibé parte STAE orienta ona ekipa iha tempu badak sei sinkroniza.

“Iha setembru nia rohan ne’e bele hasai ona 1% hosi kada aldeia no suku, nune’e sidadaun ne’ebé iha interrese bele hatene ona. Ezemplu suku ida mak nia eleitór 2.000 mak podeser 1% ne’e 200. Ida-ne’e rekezitu ida, no seluk mak ema ne’e tenke hela iha ne’ebá, idade 17 ba leten,” nia dehan.

Governu ida-ne’e iha polítika ne’ebé di’ak tebes no lori dezenvolvimentu tenke konsentra to’o iha kraik, osan sei atribui suku sira liuhosi suku hodi garante dezenvolvimentu iha área rural.

“Agora ita seidauk hatene kandidatu hira mak sai delegada/delagadu tanba iha buletin votu xefe aldeia ho delegadu/delegada sei se laiha fotografia, iha buletin votu ba xefe suku ne’e mak iha fotografia. Entaun, lori antesipa hela posivelmente kandidatu ne’e mosu barak iha pozisaun xefe suku, xefe aldeia ho delegadu/delegada. Iha formatu buletin votu ne’ebé atu aprova iha diploma Ministerial, ami prevee hela pelumenus kandidatura 15, ida-ne’e ita antesipa de’it,” nia dehan.

Iha formatu tuir dekretu Governu ne’e hateten, hakerek uluk kandidatu nia naran ne’ebé tuir alfabetu maibé kuandu rua naran primeiru hanesan entaun sei haree eleitór ida-ne’ebé ho idade boot liu, nune’e mós ba xefe aldeia ho delegadu/delegada depois simu hotu tiha tolu ne’e tau iha iha urna, ne’ebá sei laiha tinta no nia bele sai ba li’ur.

Funsionáriu públiku bele kompete eleisaun suku

Diretór Jerál Sektretariadu Tékniku Administrasaun Eleitorál (STAE) ne’e hateten, funsionáriu públiku bele kompete eleisaun suku maibé nia direitu remunerasaun ka salariál presiza armoniza ho lei funsaun públika.

“Iha lei no dekretu Governu la bandu katak iha imkompatibilidade ba prosesu kandidatura ne’e só hateten balun de’it mak órgaun soberanu no entidade seluk maibé lá hateten iha ne’ebá kona-ba funsionáriu públiku labele kompete, ne’e lae,” nia hateten.

Acilino Manuel Branco hateten, tanba esperiénsia ida-ne’e akontese ona iha eleisaun suku 2016 liubá xefe suku balun ne’ebé eleitu no nia estatutu altura hanesan funsionáriu públiku, entaun prosesu sensibilizasaun ne’ebé la’o katak funsionáriu públiku labele kompete, lei la bandu soke ba oin ba ninia direitu remunerasaun direitu salarial sira mak presiza armoniza ho lei funsaun públika no tenke armoniza ho lei despeza públika ne’ebé mak iha.

Tanba, nia dehan, lei define momoos katak rendimentu ne’ebé dobru hosi fonte ne’ebé hanesan sei iha regra seluk, no iha lei eleisaun rasik ne’e mós hateten katak bainhira funsionáriu públiku kompete nia eleitu nia la lakon nia direitu sira.

Nia hateten, iha faktu ne’ebé iha funsionáriu públiku liu iha prosesu ne’e no órgaun kompetente sei lori ajusta ba direitu regalia sira-ne’ebé iha liga ho nia estatutu hanesan funsionáriu, nune’e nia direitu sira regalia ba órgaun komunitária ida.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!