BOBONARO, 17 outubru 2023 (TATOLI) – Ekipa tékniku Eletrisidade Timor-Leste, Empreza Públika (EDTL,E.P) Munisípiu Bobonaro, tersa ne’e halo teste ba enerjía elétrika hodi halakan ahí ba komunidade suku Raiheu no suku Atudara, postu administrativu Cailaco.
“Ohin loron ami mai koko ahi, ita atu koko sira-nia liña ne’e ho tegangan (tensaun) ne’ebé tuir standar (padraun) tékniku EDTL nian, depois ida-ne’e ahi kontinua lakan ba oin, bainhira liña ne’e prontu hotu ona, kompania na’in sei hato’o pedidu ba ezekutivu EDTL,E.P hodi mai inaugural,” Koordenadór EDTL,E.P Munisípiu Bobonaro, Mario de Jesus informa ba Tatoli, iha Hali-Mesak.
Mario de Jesús konfirma, dadus hosi lideransa komunitária iha suku Raihu uma-kain 150 hosi aldeia Oho-Ana, Aitutu no Daruasa. Nune’e mós ba suku Atudara iha uma-kain 90-resin mai hosi aldeia Tuturema no Atubuti.
Liña ne’e sei forense mós enerjía elétrika komunidade aldeia Maganutu, suku Ritabou no aldeia Nunutanan, suku Raifun, postu administrativu Maliana.
Agosto Afonso nu’udar abitante Nunutanan, sente kontente no agradese tanba bele hahú ohin kalan bele toba iha naroman nia laran.
“Ida-ne’e mak ami-nia mehi tinan 20, tanba durante ne’e ami haan, hemu toba de’it iha nakukun laran, la’o ba mai mós kalan ne’e susar loos, agora ahi lakan ona, ami fó obrigadu ba boot ba EDTL,” nia katak.
Tuir dadus ne’ebé EDTL,E.P rekolla, munisípiu Bobonaro suku 49 mak asesu ona enerjía elétrika no sei falta aldeia 12 seidauk asesu inklui suku Goulolo, maibé tama ona ba projetu eletrifikasaun komunitária ne’ebé iha hela prosesu nia laran.
Notísia relevante: EDTL finaliza ona projetu liña eletrifikasaun komunitária tolu iha Bobonaro
Jornalista : Sérgio da Cruz
Editór : Evaristo Soares Martins
