COVALIMA, 17 outubru 2023 (TATOLI) – Ema ho difisiénsia (EhD) iha suku Ogues, iha postu administrativu Maucatar, munisípiu Covalima hetan apoiu nesesidade bázika husi Sentru Solidariedade Sosiál no Inkluzaun (SSI) Covalima, Klibur Dezenvolvimentu Sustentavel Timoroan (Kadesto) no Raes Hadomi Timor Oan (RHTO) .
Distribuisaun ai-han hanesan foos kilógrama 20, fore-mungu, susu-been, sardiña, deho no seluk tan ne’e ba benefisiáriu hamutuk 67 iha suku refere.
Diretór SSI Covalima, Agapito Assís Cardoso, hatete apoiu ne’e atubele responde netik situasaun uma laran ne’ebé EhD hasoru no asisténsia ne’e sei abranje ba suku seluk.
“Governu fó tulun nesesidade bázika ladún barak, maibé fó tulun ba Ema ho Difisiénsia sira iha suku Ogues. Ema ho Difisiénsia la’ós iha suku Ogues de’it maibé iha mós suku sira seluk”, dehan.
Diretór Kadesto , Alfredo dos Santos, hatete Kadesto serbisu hamutuk ho RHTO no SSI hodi distribui nesesidade bázika ba EhD iha aldeia haat iha suku refere.
“Ita hatene situasaun agora difísil. Ema preokupa sasán folin sa’e, ita halo esforsu hodi submete proposta ba SSI no ohin iha halo distribuisaun nesesidade bázika”, realsa.
Tuir planu, sei kontinua distribui nesesidade bázika ba EhD iha suku sira iha postu Maucatar mak Belekasak (nain-48), no postu suai iha suku beco (na’in-37).
Notísia relevante: SSI finaliza ona levanmentu dadus problema bem-star sosiál iha Covalima
Jornalista: Celestina Teles
Editora: Maria Auxiliadora
