SSI finaliza ona levanmentu dadus problema bem-star sosiál iha Covalima
COVALIMA, 27 juñu 2023 (TATOLI)–Tékniku Sentru Solidariedade Sosiál no Inkluzaun (SSI) finaliza ona halo lavantamentu dadus ba komunidade ne’ebé ho problema bem-star sosiál iha munisípiu Covalima.
Notísia Relevante: SSI Covalima seidauk finaliza levantamentu dadus komunidade problema bem-star sosiál
“Ha’u hanoin finaliza ona levantamentu no dadus hotu ita submete ona ba Ministériu, Ministériu mós halo ona lansamentu dadus refere, hodi sai mós hanesan indikadór ida tuir planu orsamentu,” Diretór Solidariedade Sosiál no Inkluzaun (SSI) Covalima, Agapito Asis, hateten ba Agência Tatoli, iha salaun SSI Suai Loro, segunda ne’e.
Objetivu hosi levantamentu dadus, ema ho problema bem-estar sosiál ne’e hanesan baze dadus ba ministériu solidariedade sosiál hodi identifika ema ho problema bem-estar ne’e nia kondisaun oinsá.
Ho nune’e, nia dehan, durante tékniku hala’o levantamentu ne’e identifika komunidade ne’ebé ho problema bem-star sosiál mak hanesan grupu vulneravél, ferik katuas abandonadu, labarik, vítima dezastre, vítima violénsia doméstika, ema ho defisiénsia sira no labarik tráfiku umanu.
Munisípiu Covalima ho nia postu administrativu hitu (7) ne’e iha aldeia 148, suku 30, ne’ebé durante ne’e tékniku sira kobre ona, maske dadus submete ona ministériu maibé iha aldeia balun mak seidauk kobre.
Antes ne’e, dadus ne’ebé Agência Tatoli asesu hosi Sentru Solidariedade Sosiál no Inkluzaun Covalima rejista komunidade ho problema bem-star sosiál hamutuk na’in-3094.
Jornalista : Celestina Teles
Editór : Cancio Ximenes
