DILI, 17 outubru 2023 (TATOLI) – Ministériu Saúde liuhosi Programa Saúde Mentál husu ba ema hotu atu iha responsabilidade no tau matan ba sira ne’ebé sofre moras mentál iha Timor-Leste.
“Ha’u husu ba ita hotu tenke iha responsabilidade no tau matan ba ema sira ne’ebé sofre moras mentál, tanba Ministériu Saúde nia motto katak família mak klínika no ospitál mak komunidade, katak parte rua ne’e servisu hamutuk ita bele redús moras mentál ida-ne’e iha ita-nia rain”, Anabela da Costa Guterres informa ba TATOLI iha nia fatin Lahane, ohin.
Nia dehan, ema hotu tenke servisu hamutuk hodi haree ba kliente moras mentál, la’os parte MS nian de’it, maibé hothotu iha responsabilidade hodi tau matan ba maluk sira ne’ebé sofre moras mentál iha TL.
“Ita hotu servisu hamutuk hodi haree ba kliente moras mental, la’os parte MS nian de’it, maibé ita hotu iha responsabilidade hodi tau matan ba maluk sira ne’ebé sofre moras mentál iha ita-nia rain”, nia relata.
Nia hateten, loron mundiál saúde mentál hanesan loron ida atu ema hotu hanoin fila fali kona-ba maluk sira ne’ebé sofre moras mentál iha mundu inklui Timor Leste, Ministériu Saúde nia intervensaun ne’ebé durante hala’o mk servisu hamutuk ho paseiru sira hodi halo tratamentu no prevensaun ba moras mentál liuhosi sensibilizassun moras mentál ba komunidade sira.
Nia esplika, polítika Governu nian mak oinsá atu kapasita profisionál saúde liuhosi treinamentu, orientasaun tékniku kona-ba guia tratamentu ba moras mentál ne’ebé sei fó husi espesialista psikiatria sira ba munisípiu hotu liuliu sentru saúde sira iha territóriu nasionál.
“Atu fó hanoin mós foin dadauk iha fulan fevereiru 2023 ita lansa ona guia tratamentu ba moras mentál no SOP kona-ba sistema referál moras mentál oinsá ita atu halo referál husi komunidade ba to’o iha fatin Acut care HNGV no São João de Deus, iha laklubar, entaun servisu sira-ne’e ita kolabora hamutuk no NGO Pradet, Ministériu Solidariedade Sosiál, PHD no UNICEF”, nia hatutan.
Nia subliña, esforsu seluk mak MS servisu hamutuk ho NGO Pradet no MSSI oinsá atu haree ema ho moras mentál iha dalan ninin fó ai-han no mós fó hatais.
“Esforsu ne’ebé ita halo hodi haree ba moras mentál iha dalan ninin mk ita servisu hamutuk ho NGO pradet no MSSI hodi foti kliente sira iha dalan ninin liuhosi fó hahan no fó hatais ba kliente sira nia atividade refere durante ne’e NGO Pradet mak responsavel no apoiu husi MSSI no lori fila fali kliente ba uma. Depois kliente presiza tratamentu sira ita kolabora malu hodi kontinua fó tratamentu no follow up ba kliente sira”, nia haktuir.
Tuir dadus, janeiru to’o setembru ema moras mentál ne’ebé hala’o tratamentu saúde iha fasilidade saúde hotu iha territóriu nasionál hamutuk 1.833.
Jornalista : Felicidade Ximenes
Editór : Zezito Silva
