COVALIMA, 17 outubru 2023 (TATOLI) – Komandante PNTL Covalima, Superentindente Polísia Calisto Gonzaga submete ona propostu ba Komandu Jerál hodi husu apoiu membru 30 husi nasionál atu asegura eleisaun suku iha munisípiu ne’e.
“Ha’u simu ona lista katak sei estabele sentru votasaun iha aldeia 148 iha munisípiu Covalima no komandu munisípiu menus rekursu uamanu. Ha’u submete ona proposta ne’ebé tempu badak membru husi nasionál sei dezloka mai iha munisípiu hodi reforsa seguransa iha sentru votasaun sira”, Calisto Gonzaga hateten iha komandu PNTL Covalima, Santa Rosa.
Superintendente ne’e salienta ho tulun husi membru sira nasionál mak kada sentru sentru votasaun sei koloka seguransa na’in-rua.
“Importante membru husi nasionál bele ajuda ami iha sentru votasaun sira ne’ebé eziste iha munisípiu Covalima”, nia salienta.
Tuir kalendáriu, eleisaun suku sei hala’o iha loron 28 outubru, nune’e iha loron 13 ne’e kadidatura xefe suku iha territóriu rejista ona sira-nian kandidatura hodi kompete iha sufrájiu refere. Tuir dadus Komisaun Nasionál Eleisaun (CNE, sigla portugés), kandidatu xefe suku iha Timor-Leste hamutuk 2.117 ne’ebé kompostu hosi feto 241 (11,38%) no mane hamutuk 1876 (88,62%).
Munisípiu Covalima iha nia postu administrativu Fatululik, Fatumea,Fohorem, Tilomar, Maucatar, Suai no Zumalai ho nia suku 30 no aldeia 148.
Preparasaun ba eleisaun suku Governu aloka ba Covalima $160.192 hodi hafahe ba rúbrika sira mak ba formasaun profisionál $7.940, instalasaun fatin $5.340, arrendamentu propriedade $ 2.500, aluga karreta $10.800, despeza operasionál $36.222, servisu profisionál $87.600 no servisu seluk $ 9.790.
Notísia relevante: PNTL Covalima seidauk simu lista estabelesimentu sentru votasaun husi STAE
Jornalista: Celestina Teles
Editora: Maria Auxiliadora
