COVALIMA, 09 outubru 2023 (TATOLI) – Komandu Polísia Nasionál Timor-Leste (PNTL) Covalima seidauk simu lista husi Sekretariadu Tékniku Administrasaun Eleitorál (STAE) sobre estabelesimentu sentru votasaun ba realizasaun eleisaun ba xefe suku sira.
Komandante PNTL munisípiu Covalima, Superintendente Polísia Calisto Gonzaga, hatete lista ba kriasaun sentru votasaun seidauk iha, maibé nia parte rona ona informasaun katak kandidatu sira sei hahú rejistu iha 13 outubru no sei halo kampaña eleitorál.
“[Bainhira] ha’u simu ona lista husi STAE sei koloka ita-nian membru sira depende estabelesimentu sentru votasaun. Iha Covalima iha aldeia 148 no konserteza membru la’o to’o, maibé ha’u informa ona ba nasionál atubele apoia. Ajente PNTL inklui ho komandante munisípiu hamutuk mak na’in-148, entaun ha’u mós tenke ba hotu”, dehan.
Tuir dadus husi STAE Covalima, totál eleitór ne’ebé mai husi postu administrativu Fatululik, Fatumea, Fohorem, Fatumea, Tilomar, Maukatar, Zumalai no Suai hamutuk 49.436 kompostu husi mane 25.220 no feto 24.216. Eleitór ne’ebé mate hamutuk 353 – mane na’in-186 no feto 167.
Ba eleisaun refere STAE Covalima simu ona materiál hanesan urna hamutuk 444 no toa 30 hodi fasilita sufrájiu ne’ebé sei realiza iha 28 outubru.
Notísia relevante: STAE Covalima simu ona urna 444 ba eleisaun suku 2023
Jornalista: Celestina Teles
Editora: Maria Auxiliadora
