VIQUEQUE, 17 outubru 2023 (TATOLI)—Servisu Edukasaun munisípiu Viqueque identifika estudante hamutuk na’in-sia la konsege partisipa iha ezame nasionál.
“Ezame nasionál ba tinan letivu 2023 realiza durante loron-rua nia laran, hahú segunda no tersa ne’e. Ami deteta iha estudante na’in-sia hosi munisípiu Viqueque la partisipa ezame nasionál,” Diretór Servisu Edukasaun Viqueque, Domingos Brandão, hateten ba Agência Tatoli, iha postu Viqueque Vila, tersa ne’e.
Estudante sia ne’ebé auzente, iha estudante na’in-ida hosi Ensinu Báziku Mundu Perdidu Ossu ho kondisaun moras no sei baixa iha ospitál, enkuantu na’in-ualu seluk laiha justifikasaun.
“Estudante ida moras ne’e posibilidade sei tuir filafali ezame nasionál, maibé ba na’in-ualu seluk ne’e ami agora seidauk iha informasaun hosi sira,” nia akresenta.
Notísia relevante : Servisu Edukasaun Viqueque rejista estudante 3.402 sei partisipa ezame nasionál
Estudante na’in-sia ne’e kompostu hosi Eskola Ensinu Báziku na’in-ualu no Ensinu Sekundáriu na’in-ida.
“Ami identifika mós iha estudante na’in-tolu isin rua no sira partu ona, nune’e daudaun ne’e, sira na’in-tolu kontinua partisipa ezame nasionál hamutuk ho estudante sira seluk,” nia hato’o.
Ekipa Servisu Edukasaun Viqueque daudaun kontinua halo monitorizasaun ba ezame nasionál iha postu administrativu lima.
“Ezame nasionál tinan ida-ne’e la’o di’ak tebes,” nia akresenta.
Estudante ne’ebé partisipa ezame nasionál ba tinan letivu 2023 kompostu hosi Ensinu Báziku, Ensinu Sekundáriu no Tékniku Vokasionál hamutuk 3.402.
Estudante hosi Eskola Ensinu Báziku Sentrál (EBC, sigla portugés) na’in-1.925 okupa sala hamutuk 110, Eskola Ensinu Sekundáriu Jerál (ESJ) kompostu hosi siénsia teknolojia na’in-780, siénsia sosiál umanidade na’in-587 okupa sala 34 no Eskola Tékniku Vokasionál (ETV) hosi departamentu informátika na’in-32 no departamentu agrária na’in-78, nune’e akumula estudante na’in-110 okupa sala hitu.
Jornalista : Vitorino Lopes da Costa
Editora : Julia Chatarina
