VIQUEQUE, 18 outubru 2023 (TATOLI)—Kandidatu xefe suku no atuál xefe suku Caraubalu, postu Viqueque, munisípiu Viqueque, João Pinto, hakarak loke dalan iha kada bairru bainhira hetan fiar re-eleitu iha eleisaun suku.
“Ha’u rejista ona iha meza asembleia atu re-kandidatu tan ba xefe suku Caraubalu, bainhira eleitór sira fó fiar ba ha’u re-eletu, ha’u sei uza orsamentu Programa Nasionál Dezenvolvimentu Suku (PNDS) hodi loke dalan ba kada bairru sira atu abitante sira bele asesu no loke luan sidade Viqueque. Se la’e ita la’o iha estrada boot de’it,” João Pinto, hateten iha sede suku Caraubalu, kuarta ne’e.
Líder komunitáriu ne’e kompromete sei kontinua obra sira hosi PNDS, hanesan reabilitasaun sede suku, RSS síkulu ne’ebé implementa uluk ona iha aldeia Lamaclara no aldeia Wesa metru 300 liga ba ponte Uetara.
Programa prioridade maka atu promove identidade kulturál iha suku Caraubalu, promove no kapasita feto iha aldeia sira, hafasil atendimentu administrasaun suku, inklui fasilita ferik no katuas sira ho idade 60 asesu subsídiu idozu.
“Karik povu fó fiar ba ha’u, ho programa PNDS sira-ne’e sei halo mós reabilitasaun eskola sira, promove no fasilita hasa’e kapasidade feto, kultura, hafasil sistema administrasaun, fasilita idozu asesu ba subsídiu no fasilita bolsa da mãe jerasaun foun,” nia tenik.
Notísia relevante : PNTL Viqueque sei asegura Eleisaun Suku
Nune’e mós nia afirma, bainhira povu la fó fiar, maka sei kontinua kolabora no kontribui nafatin ho xefe suku eleitu hodi apoia ba prosesu dezenvolvimentu iha suku Caraubalu.
“Eleisaun suku hanesan festa família no suku Caraubalu, ami iha kandidatu hamutuk na’in-tolu, kompostu hosi mane tolu no feto ida. Ida ne’ebé eleitu sai xefe suku, ha’u nafatin kolabora ho sira hodi halo dezenvolvimentu iha suku ida-ne’e. Ha’u-nia apoiante eleitór ba kandiatura hamutuk 487, ne’ebé prienxe rekezitu 1%,” nia hato’o.
Tuir dadus eleitór hosi suku Caraubalu hamutuk 4.315 iha tinam 2023, kompostu hosi eleitór mane 2.272 no feto 2.043, iha aldeia hitu hanesan Kabira Oan iha eleitór 1.172, Has-Abut eleitór 293, Lamaclaran 354, Mamulac 824, Manehat 786, Siralari 307 no Wesa 579.
Tuir kalendáriu, eleisaun suku sei realiza iha loron 28 outubru 2023 hodi hili líder komunitáriu sira kompostu hosi xefe aldeia, xefe suku, delegadu/a.
Jornalista : Vitorino Lopes da Costa
Editora : Julia Chatarina
