BAUCAU, 18 outubru 2023 (TATOLI) – Komandu Polísia Nasionál Timor-Leste (PNTL) munisípiu Baucau husu komunidade kontribui estabilidade durante períodu eleisaun suku iha Baucau.
Komandante PNTL Baucau, Superintendente Xefe, Antoninho Mauluta, esplika, atu prosesu tomak kona-bá eleisaun suku lao ho sussesu komunidade presiza hamutuk ho PNTL hodi hatudu katak Baucau mós hatene kria situasaun hakmatek.
“Hotu-hotu tenke hamutuk ho PNTL oinsá atu haree ba preparasaun to’o eleisaun situasaun tenke la’o di’ak,” Komandante PNTL Baucau hateten iha Vila Nova, kuarta ne’e.
PNTL liuhosi enkontru mensál ho komandante eskuadra inklui seksaun sira ko’alia kona-bá preparasaun eleisaun suku hanesan rekursu umanu no rekursu materiál nune’e prepara planu operasaun iha eventu demokrasia hodi hili lideransa komunitária iha Baucau.
PNTL Baucau sei halo proposta ba komandu jerál bazea ba planu ne’ebé prepara hodi prienxe situasaun hotu ligadu ho eleisaun suku liuliu rekursu umanu nune’e presiza tán apoia hosi nasionál hanesan koloka ba sentru votasaun no forsa rezerva.
“Ita propoin tán membru na’in-100 atu koloka ba sentru votasaun, mínimu membru na’in-ida iha kada sentru votasaun,” Superintendente xefe Mauluta akresenta.
PNTL Baucau prepara mós apoia manutensaun ba transporte ne’ebé hato’o direita ona hosi kada eskuadra hotu nune’e tuir planu sei aprezenta ba komandu jerál PNTL atu rezolve antes realizasaun eleisaun.
Totál membru PNTL atuál iha munisípiu Baucau hamutuk 185, komposta hosi ativu na’in-182 no na’in-tolu seluk kondisaun moras ne’ebé prontu atu asegura seguransa iha sentru votasaun hamutuk 214.
Jornalista : Natalino Belo
Editór : Evaristo Soares Martins
