PR Horta ohin to’o Arabia Saudita partisipa simeira ASEAN

ARABIA SAUDITA, 18 outubru 2023 (TATOLI)—Prezidente Repúblika (PR), José Ramos Horta ho delegasaun, kuarta ne’e, to’o ona iha Riyadh, Arabia Saudita hodi partisipa Simeira ASEAN-GCC (Gulf Cooperation Council).

Notísia Relevante: EAU prontu fó empréstimu ho funan ki’ik ba Timor-Leste

Xefe Estadu hala’o voo hosi Abu Dabhi ho aviaun Airlane Arabia Saudita to’o iha aeroportu King Khaled International Airport, Arabia Saudita iha tuku oras 16h15 oras Arabia Saudita nian, ne’ebé simu ho parada militár hodi akompaña simu direta hosi HRH Prince Mohammed bin Abdulrahman bin Abdulaziz, Deputy Governor of Riyadh Region, hodi hato’o benvindu ba Xefe Estadu hafoin kontinua ba iha otel Ritz Carlton ne’ebé parte protokulu prepara.

Tuir ajenda iha loron 20 fulan-outubru ne’e Xefe Estadu sei partisipa iha simeira ASEAN-GCC (Gulf Cooperation Council).

Iha sorumutu ne’e, Prezidente Repúblika sei hala’o sorumutu bilaterál ho líder sira Estadu Gulfu.

Timor-Leste (TL) mak membru observadór ASEAN nian, asume hanesan kompromisu ida hodi asegura nia prezensa no partisipasaun iha sorumutu ASEAN hotu-hotu.

Aleinde ne’e, sorumutu ida-ne’e fó mós oportunidade, liuliu atu estabelese kontaktu nivel aas ho líder sira iha rejiaun ida-ne’e, GCC inklui hosi Estadu Kuwait, Qatar, Oman, Arabia Saudita, Bahrain no Emiradu Arabe Unidu (EAU)

Durante vizita ne’e, akompaña hosi Vise Ministra Asuntu ASEAN, Milena Rangel, no sira-nia delegasaun.

Enkuantu antes dezloka ba Arabia Saudita, Prezidente Repúblika mós hala’o vizita ofisiál iha Abu Dabhi no durante vizita ofisiál ne’e hala’o sorumutu bilaterál ho nia omólogu, Prezidente Emiradu Árabe Unidu (EAU), Liurai Sua Majestade, Sheikh Mohamed bin Zayed Al Nahyan, Prezidente Parlamentu Federál EAU no membru Governu EAU nian ho ema importante sira seluk ne’ebé iha pozisaun aas iha nasaun ne’e.

Durante sorumutu bilaterál ko’alia hametin kooperasaun entre nasaun rua no reforsa kooperasaun liliu iha área investimentu hanesan apoiu EAU ba iha investimentu iha área agrikultura, seguransa alimentár, enerjia renovável, turizmu, dijitalizasaun, otél no sentru konvensaun, rezidénsia ba estudante universitáriu, ko’alia mós estabelesimentu Embaxada Timor-Leste iha EAU, inklui ko’alia konferénsia altu nível mudansa klimátika iha fulan dezembru ne’e UEA mak lidera hamutuk ho Nasaun Unida.

Iha sorumutu bilaterál EAU espresa hametin relasaun ho Timor-Leste no prontu apoiu Timor-Leste iha área investimentu hodi mobiliza investidór sira hosi nasaun ne’e ba investe iha TL.

Biban hanesan Xefe Estadu mós partisipa iha 8th World Invesment Forum 2023, Investing in sustainable Development, Global Leaders Investment Summit ne’ebé sai hanesan oradór prinsipál hodi aprezenta iha fórum mundiál ne’e kona-ba Timor-Leste (TL) ne’ebé iha estabilidade polítika no promove investimentu direitu estranjeiru importante ba TL atinji objetivu dezenvolvimentu nasionál, nune’e konvida investidór estranjeiru atu ba investe iha TL.

Fórum mundiál ne’e partisipa hosi partisipante hamutuk 8000 ne’ebé mai hosi nasaun 196 Xefe Estadu no Xefe Governu hosi nasaun haat no Ministru husi nasaun 47 ho oradór na’in 562, organizasaun mundiál no rejionál ho nasionál hamutuk 85.

Fórum ne’e realiza hosi United Nations Conference on Trade and Development (UNCTAD) serbisu ho hamutuk ho Governu EAU.

Enkuantu, Prezidente Repúblika, José Ramos Horta, no delegasaun sei fila hikas mai Timor-Leste iha loron 22 fulan outubru.

Jornalista : Nelson de Sousa

Editór      : Cancio Ximenes