ABUDABI, 15 outubru (TATOLI)— Prezidente`Repúblika, José Ramos Horta, domingu ne’e, hala’o enkontru Ministru Negósiu Estranjeiru EAU, Abdullah bin Zayed Al Nahyan, hodi ko’alia kona-ba kooperasaun bilaterál entre nasaun rua ne’e.
Notísia Relevante: PR Horta-Prezidente EAU diskute hametin kooperasaun iha área investimentu
Prezidente Repúblika (PR), José Ramos Horta, hateten Emiradu Árabe Unidu (EAU, prontu fó empréstimu osan ho funan ki’ik ba Timor-Leste hodi hala’o dezenvolvimentu.
“Ha’u hateten ami lakohi husu buat ida, tanba ema bara-barak mai hatene ona rai riku boot, entaun hakarak husu maibé ha’u lakohi husu buat ruma. Maibé se ba oin Governu Timor-Leste presiza karik husu impréstimu ne’ebé ho funan ne’e kii loos pursentu ida. Se ba oin Governu Timor-Leste hakarak husu empréstimu ne’ebé ho funan badak loos ho pursentu ida, sira (EAU) prontu atu haree ba Timor-Leste,” PR Horta hateten ba jornalista sira iha Hotel Stregis Abu Dahbi.
Iha enkontru ne’e haforsa no hakle’an liután asuntu ne’ebé antes ne’e PR Horta ko’alia tiha ona ho Prezidente EAU hanesan apoiu EAU ba iha investimentu iha área agrikultura, seguransa alimentár, enerjia renovável, turizmu, dijitalizasaun, otél ka sentru konvensaun no pedidu konstrusaun ba rezidénsia ba estudante universitáriu.
Aleinde ne’e, relativa ho oinsá Timor-Leste ho UEA kolabora no koopera kona-ba konferénsia altu nível mudansa klimátika iha fulan dezembru ne’e UEA mak lidera hamutuk ho Nasaun Unida, ne’ebé halo mós konvite konvida PR Horta no Primeiru Ministru, Kay Rala Xanana Gusmão atu partisipa, no iha sorumutu ne’e ko’alia oinsá tulun Timor-Leste liuliu fó empréstimu ho funan ki’ik ba apoiu dezenvolvimentu Timor-Leste.
Nia dehan, la signifika Governu Timor-Leste sei uza oportunidade ida-ne’e, depende se Governu Timor-Leste hakarak halo pedidu empréstimu ruma hanoin ne’e oportunidade di’ak ida.
Durante sorumutu, Ministru Negósiu Estranjeiru kompromete prontu apoiu mobiliza investidór atu investe iha Timor-Leste.
“Nia, Ministru Negósiu Estranjeiru no nia mós liurai (Prezidente EAU) nia alin, nia hateten sira prontu mobiliza investidór halo otel. Ne’e hanesan negósiu, la’ós ajuda maibé ita presiza liuliu mak investidór, ne’e mós sira prontu atu halo. Ha’u konvida sira haruka ekipa téknika ida ba iha ne’eba,” nia hateten.
Xefe Estadu ne’e hateten, Timor-Leste ho EAU halo relasaun metin liután hodi reforsa no mobiliza investidór atu investe iha Timor-Leste.
Entretantu, iha enkontru ne’e akompañadu hosi Vise Primeiru-Ministru Koordenador Asuntu Ekonomiku no Ministru Turizmu no Ambiente, Francisco Kalbuady Lay, Vise Ministru ba ASEAN, Milena Rangel.
Notísia Relevante: Fevereiru 2024: Timor-Leste sei estabelese embaixada iha EAU
Jornalista : Nelson de Sousa
Editór : Cancio Ximenes
