VIQUEQUE, 19 outubru 2023 (TATOLI)–Empreza responsável ba manutensaun estrada hosi postu Viqueque Vila to’o suku Uma-Uain Leten hahú destaka ekipamentu hodi halo serbisu taka dalan kuak sira.
Diretór Servisu Obra Publika munisipiu Viqueque, Mário do Rego, hateten, daudaun tama ona faze daruak manutensaun estrada ho distánsia kilométru 26 resin.
“Foin lalais empreza responsável Samadare Unip Lda fakar uluk ona rai henek no rai mutin sira ba dalan kuak hosi Viqueque to’o Uma-Uain Leten. Depois empreza lori ekipamentu selindru ba fali fatin seluk nune’e sira la serbisu, maibé horiseik sira-nia eskapatór no silindru hahú destaka ona iha ne’ebá hodi halo normalizasaun,” Diretór informa ba Agência Tatoli, iha postu Viqueque Vila, kinta ne’e.
Notísia relevante : Empreza sei kontinua manutensaun estrada Viqueque-suku Uma Uain Leten
Diretór Servisu Obra Publika munisipiu Viqueque orienta ona empreza hodi aselera servisu manutensaun.
“Sira la halo serbisu hodi impaktu ba movimentu transporte públiku sira ne’ebé hala’o movimentu. Tanba ne’e maka ha’u orienta sira hodi aselera serbisu,” nia hato’o.
Empreza taka dalan sira ne’ebé kuak no monu hodi fasilita movimentu transporte hosi Viqueque bá Uatulari no Uatucarbau sira.
“Ami-nia ekipa téknika hosi Servisu Obra Publika Viqueque daudaun kontinua halo akompañamentu ba empreza ne’ebé normaliza estrada,” nia tenik.
Orsamentu ne’ebé aloka ba manutesaun estrada ne’e hamutuk $300.000 resin, ho durasaun serbisu tinan-rua, hahú tinan 2022 to’o 2023.
Jornalista : Vitorino Lopes da Costa
Editora : Julia Chatarina
