COVALIMA, 19 outubru 2023 (TATOLI)- Servisu Edukasaun Covalima identifika estudante finalista na’in-16, husi totál 2.679 la realiza ezame nasionál ba periódu tinan 2023.
Xefe Departamentu Parke Eskolár, Manuel França, hatete alunu na’in-16 ne’e sia husi ensinu báziku, tolu ensinu sekundáriu jerál no haat tékniku vokasionál.
Razaun estudante sira ne’e la realiza ezame nasionál tanba moras no balun nia dokumentu laiha hanesan diploma husi eskola bázika nian.
“Ba estudante finalista ne’ebé la tuir ezame nasionál tanba moras sei fó oportunidade atu realiza ezame, maibé ba sira ne’ebé laiha justifikasaun no balun difísil atu kontaku oinsa mak nia bele tuir fali ezame nasionál”, dirijente ne’e dehan.
Tuir kalendáriu, ezame nasionál ba estudante 9.o no 12.o anu hahú iha loron 16 no sei remata iha 18 fulan-outubru.
Tuir dadus husi Ministériu Edukasaun, estudante 9.o no 12.o anu hamutuk 56.498 iha territóriu mak realiza ezame nasionál. Husi totál ne’e, 29.100 husi ensinu báziku, 23.256 sekundáriu jerál no 4.142 eskola tékniku vokasionál.
Notísia relevante: Edukasaun Covalima simu ona lista estudante finalista 2,786 partisipa ezame nasionál
Jornalista: Celestina Teles
Editora: Maria Auxiliadora
