DILI, 19 outubru 2023 (TATOLI)—Komisáriu Autoridade Aduaneira (AA)/Alfándega, José António Fátima Abílio, rekoñese durante ne’e iha duni atividade ilegál tanba rekursu umanu ne’ebé iha la to’o atu kobre.
“Sigaru ilegál sira ne’e loron-loron tama, maski kuantidade oitoan. Atividade ilegál iha tanba menus rekursu hanesan membru Unidade Patrullamentu Fronteira (UPF) limitadu, enkuantu Alfándega iha postu rua de’it no UPM. Ne’ebé ho fronteira tasi no terrestre luan ita hasoru difikuldade atu kontrola. Tanba ne’e, maka investe iha infraestrutura, fasilidade no rekursu umanu ne’e importante hodi kontrola no kombate atividade ilegál,” Komisáriu Alfándega hateten iha salaun Alfándega, Palásiu Governu, kinta ne’e.
Nia dehan, sigaru ilegál tama barak tanba konsumidór prefere fuma sigaru ilegál.
“Sigaru sira ne’ebé tama legál kumpre rekezitu hosi Ministériu Saúde kona-ba alkatraun ne’ebé tenke redús kompara ho sigaru ilegál ninia alkatraun a’as. Ida legál ne’e presu baratu, ilegál ne’e presu karun maibé konsumidór sira sosa mak ida ilegál ne’e tanba fuma ba gostu, no legál ne’e fuma ba la gostu. Tanba ne’e filafali ba konsumidór rasik,” José António, esplika.
Notísia relevante : Alfándega nota empreza importadór hatama sasán hosi postu integradu fronteira terrestre
Tanba ne’e, Ministériu Saúde presiza halo sosializasaun maka’as ba komunidade hodi halo prevensaun ba moras.
Nia nota, durante ne’e Governu hatuur lei maibé laiha seriedade hodi kombate no la aplika sansaun ruma ba sidadaun fuma sigaru ilegál, tanba ne’e sirkulasaun ilegál nafatin la’o iha espasu livre sira.
“Ami rekoñese katak sigaru ilísitu kontinua tama maibé la signifika katak ami la halo kontrolu, ami mós rekoñese katak iha difikuldade, tantu Alfándega ne’ebé konsentradu liu iha postu intergadu sira maibé hosi instituisaun seluk hanesan UPF konsentra liubá fronteira terrestre,” nia tenik.
Komisáriu salienta, realidade hatudu ona katak atividade no importasaun ilegál sira tama nafatin maski presu sigaru hatún ona.
“Esforsu ne’ebé Alfándega halo mak deteta hosi sistema, entaun foti kedas, aleinde ne’e hamutuk ho instituisaun relevante halo operasaun konjunta hodi kontrolu, liu-liu fronteira marrítima hanesan área kosteira sira tanba sigaru ilegál sira ne’e barak liu ema hatama liuhosi ró kiik no hosi fronteira terrestre,” nia esplika.
Jornalista : Antónia Gusmão
Editora : Julia Chatarina
