DILI, 17 outubru 2023 (TATOLI)– Autoridade Aduaneira (AA/Alfándega) nota katak, durante ne’e empreza importadór balun hatama sasán liuhosi postu integradu fronteira Batugade, kompara ho liuhosi Potru Tibar, ne’ebé Governu halo ona investimentu, ho ekipamentu modernu.
“Importadór sira buka hela estratejia bainhira iha dalan sira hatama sasán, maske Governu halo hela investimentu iha Portu Tibar maibé dalan ida hosi fronteira terrestre mós bele fasilita prosesu ne’e entaun sira halo dezkarregamentu iha Atapupu ka Wini depois mak tula mai ho transporte sira. Ne’e meiu ida importante mak ita iha postu integradu para kontrola hodi sira selu tuir prosedimentu”, Komisáriu Autoridade Aduaneira, José António Fátima Abílio, hateten ba Agência Tatoli, iha nia knaar fatin Palásiu Governu, tersa ne’e.
Nia esplika, diferensa maka sé liuhosi Atapupu nia mai prosesu, iha fee sira ne’ebé mak atu selu hanesan iha Portu Tibar ne’e laiha, tanba liuhosi fronteira terrestre ne’e selu de’it área estasionamentu, kada loron $25, maibé kontazen taxa sira ne’e hanesan mós aplika iha pontu entrada sira hotu.
Enkuantu, iha Portu Tibar bainhira halo dezkarregamentu tenke selu prestasaun servisu hanesan hatun kontentór, muda kontentór ba mai mós tenke selu, kustu sira ne’e tuir tarifa ne’ebé aplika. Maibé iha pontu entrada fronteira terrestre nian ne’e fasil liu, katak bainhira sasán mai Alfándega verifika hotu, selu tiha taxa bele sai ona.
“Diferénsia ne’e tanba liuhosi portu Tibar sira tenke selu prestasaun servisu bainhira sira utiliza fasilidade portu nian, kuandu hosi fronteira terrestre laiha. Maibé iha parte seluk tenke haree didi’ak tanba estrada sira hosi fronteira mai Dili ne’e halo uza orsamentu empréstimu, ne’ebé presiza aplika tarifa ida ba tonelazen, ezemplu karreta ida tula sasán tinelada 10 tenke selu tuir tarifa ne’ebé prevee, ida ne’e para rekupera no redús mós merkadoria hosi fronteira”, nia fó hanoin.
Aplika tarifa kompeténsia DNTT
Foin lalais governu estabelese ona báskula-ponte (jembatan timbang) ba tetu karreta ne’ebé tula sasán liuhosi ponte integradu Postu Batugade.
“Ponte ne’e atu ajuda tetu de’it, atu aplika tarifa ne’e kompeténsia Diresaun Nasionál Transporte Terrestre, Alfándega labele kobra tanba viola regra”, nia dehan.
Notísia relevante : https://tatoli.tl/2023/02/17/governu-lansa-baskula-ponte-ba-kamioneta-tula-sasan-iha-fronteira-batugade/
Jornalista : Antónia Gusmão
Editór: Rafael Ximenes de A. Belo
