DILI, 19 outubru 2023 (TATOLI) – Ministériu Edukasaun no Embaixada Portugál diskute ona formasaun espesífika iha setór produtivu sira ba profesór sira iha eskola tékniku vokasionál (TEKVOK).
Sekretáriu Estadu Edukasaun Ensinu Sekundáriu no Eskola Téknika (SEEESET), Domingos Lopes Lemos, hatete sorumutu ne’e atu aborda preparasaun ba formasaun profesór sira, tanba eskola TEKVOK ninia nivel ensinu ne’e bainhira dezenvolve ho di’ak sei hadi’a kualidade manorin sira.
“Ministériu Edukasaun ho Embaixadora Portugál tau hanoin hamutuk ona atu realiza formasaun ida adekuada ba profesór sira hodi hasa’e kapasidade no abilidade manorin sira-nian, nune’e sira bele transforma fali siénsia ne’ebé hetan ba estudante sira”, Domingos Lemos realsa iha Vila Verde, ohin.
Planu ba formasaun ne’e parte rua diskute ona no bainhira hetan ona desizaun ruma bele realiza hodi tulun profesór sira ne’ebé hanorin iha área espesífika.
Embaixadora Portugál iha Timor-Leste, Manuela Bairos, afirma katak enkontru ho sekretáriu Estadu ne’e ko’alia kona-ba hadi’ak kualidade ensinu TEKVOK hodi reforsa kooperasaun iha área ida ne’ebé importante tebes ba Timor-Leste no ba joven timoroan sira.
“Hau hanoin ne’e momentu ida importante tebes atu halo diskusaun kona-ba área importante sira ne’e, bele iha tinan ne’e nia rohan, bele mós iha inísiu tinan oin. Ami sei halo negosiasaun ho Timor-Leste kona-ba programa estratéjiku kooperasaun foun ne’e. Tanba ne’e mak ha’u mai iha ne’e atu hamutuk ho sekretáriu Estadu hodi hatene área prioritária sira ne’ebé mak Portugál bele fó apoiu”, dehan.
Embaixadora ne’e salienta katak Portugál iha esperiénsia barak iha área sira ne’e, espesialmente iha turizmu lokál, turizmu foho (montaña) no turizmu rurál, inklui mós área agrikultura nian, liuliu kona-ba kafé, ne’ebé la’ós de’it ekonomikamente, maibé kulturalmente sei sai importante ba Timor-Leste.
Tuir dadus ministériu, totál profesór TEKVOK ne’ebé hanorin iha eskola 51 iha territóriu hamutuk 775. Profesór sira ne’e hanorin iha programa hotu inklui sosiokulturál nomós siénsia nian, maibé manorin espesífiku iha área importante sira foin maka 200-resin de’it.
Jornalista: Tomé Amado
Editora: Maria Auxiliadora
