COVALIMA, 20 outubru 2023 (TATOLI)—Sekretária Estadu Komunikasaun Sosiál (SEKOMS) liuhosi Sentru Formasaun Téknika Komunikasaun (CEFTEC, sigla portugés) fasilita formasaun ba funsionáriu públiku sira iha Covalima durante loron lima iha área multimedia.
Notísia Relevante: CEFTEC kapasita funsionáriu Viqueque kona-ba relasaun públika no serbisu protokolu
Xefe Departamentu Kooperasaun, Hermenegildo Xavier, hateten formasaun durante loron lima hodi fahe matéria iha área multimedia nian mak hanesan konseitu báziku multimédia, tékniku operasaun kámara no gravasaun vidéo, tékniku hakerek notísia, audiu visuál, etapa produsaun video notísia audio visuál, tékniku edisaun vidéo no kria Fun Page mídia sosiál.
“Ami hosi SEKOMS liuhosi CEFTEC fasilita formasaun ne’ebé iha nivél nasionál finaliza ona no agora nivél munisípiu foku iha área multimedia,” Hermenegildo Xavier hateten ba Agência Tatoli iha salaun AMC, Sukaer-Laran, sesta ne’e.
Durante ne’e, CEFTEC fasilita formasaun iha nivél munisípiu sira hanesan iha munisípiu Viqueque foku iha área relasaun públiku no protokolu, iha Covalima formasaun kona-ba multimedia no sei kontinua formasuan iha munisípiu Aileu no Ainaro.
CEFTEC fasilita Formasaun ida-ne’e, ho nia vizaun jerál atu mellora profisionál servisu iha área komunikasaun sosiál sira bele intende no iha munisípiu iha koñesimentu báziku kona-ba mídia.
Bazeia ba alvu formasaun ida-ne’e, ba sira-ne’ebé servisu iha mídia, nune’e hafoin formasaun ne’e sira bele kontinua servisu saida mak sira simu hosi formasaun refere.
“Ami-nia alvu fasilta formasaun iha área multimedia tanba Ajénsia Teknolojia Informasaun no Komunikasaun Timor, Institu Públiku (TIC, I.P) instala ona tékniku informátika iha munisípiu hotu oinsa ho rekursu bele opera no ema ne’ebé servisu iha área komunikasaun sosiál maibé depende administradór mak deside,” nia hateten.
Formasaun durante loron lima ne’e hahú iha segunda (16 outubru) to’o sesta (20 outubru 2023), ne’ebé la’ós foku de’it ba teória maibé formandu sira mós halo prátika oinsa atu hekerek, editing video, prodús video no bele públika iha Fun Page.
Funsionáriu públiku ne’ebé tuir formasaun kona-ba multimedia ne’e hamutuk na’in-21 ne’ebé kompostu hosi feto na’in-11 no mane na’in-10, ne’ebé mai hosi ministériu sira hanesan Edukasaun, servisu munisipál Obra públika, servisu rejistu notariadu Covalima no seluk tan.
Jornalista : Celestina Teles
Editór : Cancio Ximenes
