Formandu 53 hosi Sentru Formasaun Beaço kontribui ba dezenvolvimentu Viqueque
VIQUEQUE, 20 outubru 2023 (TATOLI)—Formandu 53 ne’ebé partisipa ona formasaun iha Sentru Formasaun Beaço iha suku Maluru, postu Viqueque Vila, ne’ebé estabelese hosi Sekretaria Estadu Formasaun Profisionál no Empregu (SEFOPE) munisípiu Viqueque, hahú kontribui ba dezenvolvimentu lokál.
Diretór SEFOPE Viqueque, Simões da Silva, informa, Sentru Formasaun Beaço fó formasaun iha área soldadura, eletrisidade, kanalizasaun, karpintaria no pedreiru, ne’ebé iha tinan ne’e tama ba siklu 5.
“Joven sira apreende tuir área ida-idak ne’ebé sira hili, nune’e daudaun ami orienta estudante sira atu tun baze halo estájiu profisionál ba área espesífiku lima,” Diretór hateten ba Agência Tatoli, iha postu Viqueque Vila, kinta ne’e.
Formandu ne’ebé tuir formasaun iha área kanalizasaun na’in-10, karpintaria 10, eletrisidade 11, pedereiru 11, soldadura 11.
Daudaun ne’e Sentru Formasaun Beaço akumula formadór hamutuk na’in-10, ne’ebé kada área iha formadór na’in-rua.
Simõs relata, estudante siklu 5 grupu ida halo estájiu profisionál halo konstrusaun morru Eskola Sekundáriu 04 setembru Viqueque, grupu ida estájiu iha Eskola Sekundáriu Santo Estevão halo rede protesaun no hadi’a dapur Parokia Viqueque Vila, grupu seluk kolokadu iha aldeia Buanurak halo kontrusaun monumentu levantamentu 1983 faze 3, grupu ida fó apoia ba badaen halo kontrusaun Uma Naroma Ba Povu (UNP) iha postu Ossu hodi halo instalasaun eletrisidade no grupu ida tan apoia badaen konstrusaun UNP iha suku Maluru.
“Durasaun estájiu profisionál fulan-ida hodi apoia abitante sira ne’ebé presiza, ita koloka estudante sira ba ajuda hanesan daudaun ami koloka ba fatin sira ne’e hodi estudante sira bele aplika sira-nia koñesimentu ne’ebé durante apreende,” nia hato’o.
Notísia relevante : Organizasaun Aikido abertura estabelese sentru formasaun iha Tilomar
Aleinde ne’e, Sentru Formasaun Beaço SEFOPE daudaun ne’e loke inskrisaun ba siklu 6.
“Ba siklu 6 nian daudaun ami-nia data baze loke hela, ne’ebé ba joven sira-ne’ebé hakarak apreende bele halo rejistrasaun iha eskrítoriu SEFOPE Viqueque. Dokumentu ne’ebé ami presiza maka kartaun eleitorál, bele lori mós sertidaun hodi rejista bainhira rejista hotu maka ami foin rekere ba sentru formasaun,” nia realsa.
Jornalista : Vitorino Lopes da Costa
Editora : Julia Chatarina
