Fundu Dezenvolvimentu Arabia Saudita prontu apoiu investimentu iha Timor-Leste
ARABIA SAUDITA, 19 outubru 2023 (TATOLI)—Xefe Ezekutivu Fundu Dezenvolvimentu Arabia Saudita, Sultan Al-Marshad, deklara prontu apoiu investimentu iha setór oioin iha Timor-Leste (TL).
Notísia Relevante: PR Horta ohin to’o Arabia Saudita partisipa simeira ASEAN
Xefe Ezekutivu Fundu Dezenvolvimentu Arabia Saudita akompaña ho ekipa hato’o kompromisu ne’e hafoin hala’o enkontru ho Prezidente Repúblika (PR), José Ramos Horta, kinta (19 outubru 2023) iha ótel The Ritz-Carlton, Arabia Saudita, no sira prontu atu apoiu TL hodi dudu dezenvolvimentu liuhosi investimentu.
PR José Ramos Horta hateten, enkontru ho responsável másimu ho Arabia Saudita nian ho Fundu Dezenvolvimentu ne’e hanesan instituisaun númeru um (1) sira-nian apoiu projetu oioin iha mundu, mak bele apoiu projetu dezenvolvimentu iha agrikultura, peska, infraestrutura bmak normaliza estrada no konstrui edifísiu.
“Ha’u esplika ba sira, ne’e kestaun ida pertense ba Governu nia kompeténsia. Maibé, ha’u hatene prioridade nasaun nian ne’ebé mai iha planu Governu nian tinan lima. Ida kontinua investe iha infraestrutura sei falta estrada barak iha postu administrativu, suku no aldeia. Purtantu, ne’e mak Primeiru-Ministru ko’alia. Iha enkontru ne’e, ko’alia mós kona-ba konstrui ótel no turizmu tanba Timor dezenvolve turizmu ba TL nia adezaun ba ASEAN ne’e. Ba asuntu sira-ne’e hotu, sira hateten prontu. Nune’e, Governu Timor-Leste pronto, tanba semana ida-nia laran ekipa ida hosi iha ne’e bele to’o ona iha Dili,” PR Horta hateten ba jornalista sira hafoin ramata enkontru.
Xefe Estadu ne’e hatutan, sira mós bele halo empréstimu ho funan kaman loos la’ós hanesan banku komersiál internasionál ho funan todan tebes dalaruma to’o 7-8%, no iha Timor-Leste aas liután maibé funan ne’ebé sira halo ba Governu iha terseiru mundu país naun dezenvolvimentu funan ne’e kiik.
Nune’e, nia hateten, bainhira Xefe Estadu fila ba Timor-Leste sei ko’alia ho Primeiru-Ministru (PM), Kay Rala Xanana Gusmão no Primiru-Ministru mak determina halo konvite ba sira hodi bele vizita Timoe-Leste.
Ba dahuluk, nia hateten, vizita ne’e atu halo avaliasaun hodi estuda hafoin Governu mak haree desizaun halo pedidu apoiu direitu hanesan donativu, no bele halo pedidu impréstimu ne’ebé kmaan. Buat seluk mak bele halo parseira públiku no privadu (PPP) ne’ebé Arábia Saudita no Timor-Leste tama ho investimentu.
Fundu Dezenvolvimentu Arabia Saudita iha interrese mós atu halo investimentu iha área ótel no infraestrutura.
“Hanesan ha’u rasik hateten ba sira, ami rai ida ki’ak maibé la’ós ki’ak rabat rai. Ami iha meiu no ami hakarak dezenvolvimentu relasaun amizade ho imi. Ami lakohi hahú hakruuk aan husu pedidu hanesan donativu ne’e lae, empréstimu bele. Hanesan, atu fó de’it osan ne’e ha’u iha ne’e la’ós para halo ida-ne’e. Ne’ebé, ha’u ko’alia ho sira hotu-hotu no sira konkorda, sira kontente ho ida-ne’e. Maske sira insiste hakarak ajuda duni, ita simu, maibé ha’u hateten ami la tane liman,’” PR Horta hateten
Entretantu, iha enkontru ne’e akompañadu hosi Vise-Ministra ba asuntu ASEAN iha Ministériu Negósiu Estranjeiru no Kooperasaun (MNEK), Milena Rangel.
Jornalista : Nelson de Sousa
Editór : Cancio Ximenes
