iklan

BOBONARO, ELEISAUN, MUNISÍPIU

PDHJ Bobonaro husu sidadaun partisipa eleisaun suku ho ambiente familiár

PDHJ Bobonaro husu sidadaun partisipa eleisaun suku ho ambiente familiár

Diretór PDHJ Delegasaun Territórial Maliana, Domingos Pinto Tavares. Imajen Tatoli/Sérgio da Cruz.

BOBONARO, 20 outubru 2023 (TATOLI)-Diretór Provedoria Direitu Humanu no Justisa (PDHJ), delegasaun territoriál Maliana, Domingos Pinto Tavares, husu ba sidadaun ne’ebé hela iha partensia munisípiu Bobonaro nian atu partisipa eleisaun suku ho ambiente familiár.

Nia hateten iha diferensia boot entre eleisaun ba xefe suku no aldeia  ho eleisaun parlamentár no prezidensiál tanba eleisaun suku ladun mobiliza ema barak nune’e fiar katak sei la mosu konflitu no krime iha populasaun sira-nia leet bainhira prosesu eleisaun ne’e la’o.

“Eleisaun suku ne’e nia nivél ne’e fámilia de’it sira lorloron koñese malu hela uma-mane no mane-foun ne’ebé sira sei la trata malu, karik trata malu mós ninia nivél tensaun ne’e la aas hanesan eleisaun jerál, paling ida atu sa’e ba no ida la liu mós ita maun-alin, ida liu hetan nomeasaun hosi povu ba tuur iha suku ida ne’e mós ita-nia maun alin nafatin,”Nia hateten ba TATOLI, iha kna’ar fatin sesta ne’e.

Atu eleisaun ne’e la’o di’ak, sidadaun sira tenke vota ho konsiénsia, labele konsumu alkohól bainhira atu bá vota, labele uja atributu arte-marsiál no arte rituál hodi perturba prosesu eleisaun xefe suku ne’ebé tuir orariu sei hala’o iha loron 28 fulan-outubru 2023.

“Ha’u husu imi ba vota ho konsiénsia, vota ho páz, vota ho laran malirin tanba eleisaun ida ne’e ita mesak fámilia uma laran de’it,” nia dehan.

Nia dehan PDHJ delegasaun territoriál Maliana planea ona iha loron 23 to’o 28 fulan-outubru 2023 sei koloka ofisiál sira bá iha suku sira hodi observa kona-ba eleisaun xefe suku la’o duni tuir prosesu demokratizasaun ne’ebé maka implementa iha Timor-Leste ka la’e?.

“Ita hodi hare katak ninia prosesu ne’e la’o halo nusa, tuir duni regras ne’ebé CNE ho STAE implementa nune’e fó duni balansu ba ema ho defisiénsia sira bele asesu ka lae, ninia kavina de votus, ninia sentru votasaun, estasaun votasaun sira, fó asesu duni ba ema sira ho defisiénsia matan, fizíku no idozus ferik no katuas sira,”nia informa.

Entretantu, totál sentru votasaun ne’ebé estabelese ba eleisaun suku iha Bobonaro hamutuk 193hodi kobre aldeia 193, suku 50 no postu administrativu neen.

Notísia Relevante:PNTL Bobonaro la autoriza eleitór sira uza atributu arte-marsiál no rituál iha eleisaun suku

Jornalista: Sergio da Cruz

Editór: Agapito dos Santos

iklan
iklan

Leave a Reply

iklan
error: Content is protected !!