DILI, 20 outubru 2023 (TATOLI) – Koordenadór Programa Nutrisaun Sentru Internamentu Vera Kruz, António da Cruz, dehan sentru internamentu Vera Kruz, iha setembru, deteta labarik sira ne’ebé mak ho má nutrisaun moderadu hamutuk 80 no grave 37.
“Iha fulan setembru labarik sira ne’ebé mak mai iha ne’e, ami tetu todan no sukat liman kabun leten, husi idade zero to’o tinan lima hamutuk 1.311, husi ne’e ami deteta labarik sira ne’ebé mak má nutrisaun moderadu hamutuk 80 no labarik ne’ebé grave hamutuk 37”, Antonio da Cruz informa iha nia kna’ar fatin Sentru Saude Vera Kruz, ohin.
Tanba ne’e, iha Vera Kruz ai-han planpinat estoke menus no médiku sira fó akonselamentu ba inan sira atu prepara ai-han nutritivu ba bebé sira bele han ho di’ak hodi ajuda hasa’e labarik sira nia todan hodi bele rekopera fali má nutrisaun.
Labarik sira ne’ebé ho má nutrisaun no sai komplikadu, tenke transfere ba internamentu atu halo tratamentu, hodi apoiu susubeen 75 ho F100 bazeia ba labarik nia todan durante baixa 24 oras.
“Banhira ita haree kazu la iha komplikasaun, ita fó akonsellamentu ka fó hanoin ba inan sira oinsá prepara ai-han kontinuasaun iha uma, família tenke tau atensaun hodi bele rekopera estatutu nutrisaun ne’ebé mak la di’ak”, nia esplika.
Nia husu ba inan aman sira atu lori labarik sira mai kontrola kada fulan iha sentru saúde sira ne’ebé mak besik, hodi kontrola labarik nia todan, sukat nia altura no mós liman kabun leten atu inan sira aumenta koñesimentu ne’ebé mak di’ak hodi bele kompriende atu prepara ai-han ne’ebé mak ho nutritivu.
“Iha fulan janeiru to’o setembru, ai-han supersereál ho estoke mamuk. Husu ba Servisu Saúde Munisípiu Dili hodi haree ba kestaun ne’e hodi bele distribui ai-han mai sentru internamentu Vera Krus atu bele fó atendimentu ba labarik sira ne’ebé ho má nutrisaun”, nia konklui.
Notísia relevante : Ministériu Saúde rekoñese Timor-Leste seidauk redús taxa má nutrisaun
Jornalista : Felicidade Ximenes
Editór : Zezito Silva
