SOP Viqueque ezekuta orsamentu emerjénsia normaliza dalan Sukaer Oan to’o Kararas
VIQUEQUE, 20 outubru 2023 (TATOLI)—Servisu Obra Públika (SOP) Viqueque daudaun ne’e ezekuta ona orsamentu emerjénsia hodi normaliza dalan sira ne’ebé ho kondisaun a’at hosi Sukaer Oan to’o área Kararas, postu Viqueque Vila hodi abitante sira bele halo movimentu ho di’ak.
“Administrasaun munisípiu Viqueque prevee osan $30.000 ba emerjénsia, karik dalan ruma kotu uza orsamentu ne’e, maibé orsamentu tama tarde nune’e ami ezekuta mós tarde. Entaun, daudaun ami hadi’a dalan sira ne’ebé monu, taka di’ak fali kuak hosi Sukaer Oan, área suku Uma-Ki’ik to’o Kararas, nune’e transporte sira bele asesu,” Diretór SOP Viqueque, Mário do Rego, informa ba Agência Tatoli, iha postu Viqueque Vila, sesta ne’e.
Nia dehan, dala barak akontese dezastre naturál iha Viqueque, hanesan inundasaun halo dalan kotu, bele uza orsamentu emerjénsia hodi hadi’a, maibé orsamentu ho montante ki’ik labele rezolve dalan Lugatohi.
“Orsamentu emerjénsia ne’e, ami atu halo dalan Lugatohi, maibé orsamentu emerjénsia ne’e la kobre hotu. Entaun, ami ba identifika filafali dalan-rua, ida maka área Kaenliu mosu iha Ospitál Internamentu Viqueque, nune’e ekipamentu pezadu destaka tiha iha ne’ebá atu halo maka ema atu sunu fali ekipamentu,” nia akresenta.
Notísia relevante : Empreza hahú ona reabilita dalan rurál pakote 11 iha Viqueque
Nune’e, Diretór SOP komunika ho Administradór Viqueque hodi haree dalan Sukaer Oan ba Kararas tanba dalan kotu barak.
“Ba normaliza dalan ne’e la sura nia naruk, maibé hadi’a dalan sira ne’ebé monu no kuak. Durante ne’e kareta truk sira tauk bá tula rai henek iha Kararas tanba dalan ho kondisaun a’at. Tanba ne’e, maka ita hadi’a tiha dalan ne’e hodi fasilita truk sira asesu ba suru rai henek tanba ba Kararas besik, nune’e bele fó rendimentu ba ita-nia joven sira ne’ebé suru rai henek iha Kararas,” nia relata.
Nune’e, iha fulan oin nia laran transporte sira bele asesu estrada tanba empreza halo ona normalizasaun.
Ezekusaun orsamentu emerjénsia SOP Viqueque atinje ona 50% hosi orsamentu totál $30.000.
Responsável normaliza dalan maka empreza Oan Kin Jian ne’ebé hahú serbisu iha setembru 2023.
Estrada ne’e sei benifisia abitante sira iha Kararas no públiku ne’ebé atu asesu ba fatin turizmu, Bee Luli Manas.
Jornalista : Vitorino Lopes da Costa
Editora : Julia Chatarina
