iklan

DESPORTU, BOBONARO, LEI, MUNISÍPIU

Sub-KRAM Bobonaro desimina lei 05/2017 ba Arte-Marsiál

Sub-KRAM Bobonaro desimina lei 05/2017 ba Arte-Marsiál

Prezidente KRAM, Octávio da Conceiçao, hala’o sosializasaun no introdús prosesu rejistu, ba membru Grupu Arte Marsiál (GAM) Bobonaro, iha Jináziu Maliana, sesta (10/09/21). Imajen Tatoli/Sérgio da Cruz.

BOBONARO, 20 outubru 2023 (TATOLI)Sub-Komisaun Reguladora Arte-Marsiál munisípiu Bobonaro, iha loron 20 fulan-outubru 2023 ne’e,  desimina lei númeru 05/2017, 19 abríl kona-ba rejime jurídiku prátika arte-marsiál no arte rituál, arma branka no alterasaun  da-lima kódigu penál ba membru grupu arte-marsiál no Ofisiál Polisia Suku (OPS) iha postu administrativu Maliana.

Preámblu hosi rejime rejime jurídiku prátika arte-marsiál no arte rituál, arma branka no alterasaun  da-lima kódigu penál ne’e ko’alia kona-ba prátika arte marsiál ho ninia objetivu  maka atu promove atividade fíziku ho meiu hodi transmite valór kulturál no étika hosi importánsia sosiál no kulturál ida ne’ebé iha sosiedade, espesiál ba joven sira.

Notísia Relevante:PNTL Bobonaro suspende provizóriu atividade arte-marsiál

Artigu 7 kona-ba (Ensinu, aprendizajén no prátika arte-marsiál), iha númeru 1 hateten ensinu aprendizajén no prátika arte-marsiál de’it autoriza ba ema-ne’ebé iha aptidaun psikofisiolójika ne’ebé apropriadu no oferese garantia morál no sivika iha respeitu ba orden sosiál estabelese.

Númeru 2 hosi rejime ne’e subliña, halo krime kontra seguransa Estadu, kontra orden públika, kontra vida, kontra integridade fízika ka kontra liberdade pesoál ka seksuál bele hatudu nia falta di’ak ba efeitu sira-ne’ebé la’ós iha númeru anteriór.

No iha númeru 3 hosi rejime jurídiku ne’e hodi regula kona-ba responsabilidade ba avaliasaun aptidaun pratikante nian sei iha ba sentru, klubu no eskola ne’ebé destina ba prátika arte-marsiál.

Nune’e mós iha númeru 4 hateten klibur sei mantein arkivu ho identifikasaun pratikante hotu ne’ebé akualiza di’ak.

Prezidente Sub-KRAM munisípiu Bobonaro, José Ramos esplika,  programa ne’e nu’udar atividade rutina sub-KRAM ninia atu oinsá grupu arte-marsiál sira hotu-hotu bele intende didi’ak leí no regulamentu sira ne’ebé estabelese ona.

“Ida ne’e oinsá bele divulga informasaun diakliu, liliu leí númeru 5/2017 ho primeiru no segundu despaisu ne’ebé fó sai iha dia 18 no 22 abríl ne’ebé mak ita iha para oinsá bele asesu hotu, liuliu grupu arte-marsiál sira para intende didi’ak regulamentu ne’ebé mak iha para atu regula atividade sira ne’ebé mak iha tanba dalaruma ema ladun kompriende halo atividade sira ladun hatene atu lori sira ba ne’ebé,” nia hateten durante ninia intervensaun bainhira halo desiminasaun ne’e iha salaun enkontru postu administrativu Maliana.

Prezidente Sub-KRAM munisípiu Bobonaro ne’e husu ba lideransa organizasaun arte-marsiál, atu halo resensiamentu ba membru sira nune’e bele iha dadus loloos hosi kada organizasaun arte-marsiál.

“Ita-nia Ministériu Juventude no Desportu hakarak atu hatene totál arte marsiál hira mak iha Timor laran tomak ninia membru hira, hahú hosi sira ne’ebé gradúa karik hosi PSHT iha tempu Indonezía mai to’o agora, no sira foin tama ne’e hanesan mós sira IKS ho KORK no THS-THM,” nia hateten.

Iha fatin hansan Sekretáriu Jerál Kmanek Oan Rai Klaran (KORK) Munisípiu Bobonaro, Agustino dos Santos Mouzinho, konsidera atividade desiminasaun ne’e importante tebes hodi fó hanoin ba organizasaun arte-marsiál sira atu kumpre leí sira liu-liu aselera resensiamentu dadus membru sira-nian.

“Hau hanoin desiminasaun ne’e la’ós foin halo maibé,  prezidente KRAM nasionál fó sai tiha ona maibé tanba resensiamentu ne’e seidauk fó rezultádu ne’ebé di’ak tánba ne’e mak ágora sira mai halo tan disemininasaun atu núne’e,ami hosi KORK nos bele aselera,hodi bele hatene ami nia membru iha Munisípiu kada suku, tanba tuir dadus ne’ebé fó sai ami la kompletu dukumentu sei hetan sansaun, suspende provizóriu,” Agustino informa.

Nune’e, Konseleru masímu PSHT Munisípiu Bobonaro, Arlindo de Oliveira, agradese ba estrutura Sub-KRAM Bobonaro tanba disemina ona informasaun kona-ba lei 05/2017.

“Ida para ita hotu bele fó kontribuisaun ba hamenus problema ne’ebé akontese iha ita-nia rai laran liuliu ba ita-nia arte marsiál no rituál sira iha munisípiu Bobonaro, ita hotu nia interese atu kria no halo kooperasaun di’ak hodi haree dezenvolvimentu iha ita-nia rai-laran,” nia hateten.

Entertantu, atividade desiminasaun ne’e partisipa hosi membru Ofisiál Polisia Suku (OPS) iha postu administrativu Maliana, membru PSHT, Ikatan Kera Sakti (IKS), KORK, Serulin Dewata no seluk tan.

Notísia Relevante:Kampu ezersísiu arte-marsiál iha Bobonaro seidauk kumpre regra

Jornalista: Sergio da Cruz

Editór: Agapito dos Santos

 

iklan
iklan

Leave a Reply

iklan
error: Content is protected !!